მამუკა მდინარაძე ოპოზიციაზე: რადგან ხმების გადათვლით მათი ნათქვამი არ დადასტურდა, ახალ ნარატივს ავითარებენ - რომ გადათვლას აზრი აღარ აქვს
პოლიტიკა

მამუკა მდინარაძე
ფოტო: „ქართული ოცნება“
ძალიან კარგი იქნება, თუ პარტიები „ნაცმოძრაობის“, მიხეილ სააკაშვილისა და ნიკა გვარამიას „ბულინგს“ არ დაექვემდებარებიან და მათ სიცრუეში არ ჩაჰყვებიან. ისინი რომ მართლები იყვნენ, არ დასჭირდებოდათ ტყუილებითა და მანიპულაციებით ხალხის გაბრაზება, - განაცხადა „ქართული ოცნების“ ერთ-ერთმა ლიდერმა, მამუკა მდინარაძემ პარტიის ოფისში გამართულ ბრიფინგზე.
„გუშინ ისე გვაუწყეს, რომ 80 ათასი ბიულეტენი გაბათილდა, თითქოს ქვეყანა დაინგრა და ეს იყო ყველაზე მყარი და უტყუარი მტკიცებულება იმისა, რომ თითქოს არჩევნები გაყალბდა. რეალურად, არც საქართველოში და არც მსოფლიოში არ არსებობს არჩევნები, სადაც ბიულეტენების 3-4% ბათილი არაა. შესაბამისად, ეს გამოაქვთ წინა პლანზე და ახალ ნარატივს ქმნიან, თითქოს ახლა აზრი აღარ აქვს გადათვლას. აქამდე გადათვლას ითხოვდნენ, როგორც კი დარწმუნდნენ, რომ გადათვლით არ დადასტურდა ის, რასაც ისინი საზოგადოებას არასწორად ეუბნებოდნენ, ახლა, სხვა ნარატივს ავითარებენ. ერთი საათის წინ, „მთავარის“ ეთერში მიდიოდა საუბარი იმაზე, რომ ახლა აზრი აღარ აქვს გადათვლას. ამას ამბობენ იმიტომ, რომ გადათვლის შედეგად არ დადასტურდა ის, რასაც ისინი ამბობდნენ“, - განაცხადა მამუკა მდინარაძემ.




