მარიამ ქვრივიშვილი: ნებისმიერი დესტრუქციული ქმედება საზიანოა იმ ბიზნეს გარემოსთვის, რომელიც დღეს ჩვენს ქვეყანაში ძალიან წარმატებულია
პოლიტიკა

მარიამ ქვრივიშვილი
ფოტო: მთავრობის ადმინისტრაცია
განსაკუთრებული აქცენტი გაკეთდა იმ პოზიტიურ შედეგებზე, რომელიც საარჩევნო პროცესში განხორციელდა, - ამის შესახებ მარიამ ქვრივიშვილმა მმართველი გუნდის ეუთო/ოდირის სადამკვირვებლო მისიის წარმომადგენლებთან შეხვედრის შემდეგ განაცხადა. მისი თქმით, შეიქმნა ჯანსაღი, კონკურენტული გარემო, რაც ყველა პოლიტიკური პარტიის აქტივობაზე აისახა.
„რაც ყველაზე მნიშვნელოვანია, დაცული იყო ასევე ადამიანის ფუნდამენტური უფლებები. თითოეულ ჩვენგანს გვმართებს უაღრესად მაღალი პასუხისმგებლობა იმ მიმდინარე პროცესებზე, რაც არის ჩვენს ქვეყანაში, რადგან ნებისმიერი დესტრუქციული ქმედება საზიანოა იმ ბიზნეს გარემოსთვის, რომელიც ძალიან წარმატებულია დღეს ჩვენს ქვეყანაში“, - განაცხადა ქვრივიშვილმა.
საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,15 %; „ნაციონალური მოძრაობა - გაერთიანებული ოპოზიცია“ - 27,14%; „ევროპული საქართველო“ - 3.78%; „ლელო“ – 3,15%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ.
საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.
ოპოზიციურმა პარტიებმა კი ოფიციალური დოკუმენტი მიიღეს და ხელმოწერით დაადასტურეს, რომ პარლამენტში არ შევლენ.





