ირაკლი კობახიძე: 30-ვე ოლქში უპირობო გამარჯვებას ველით, თუმცა ოლქების ნახევარში მეორე ტური გვექნება

30-ვე ოლქში უპირობო გამარჯვებას ველით. მინიმუმ, 14 შემთხვევაში, სავარაუდოდ, 16-შიც, პირველივე ტურში ვიგებთ არჩევნებს, თუმცა დანარჩენ შემთხვევებში, გვექნება მეორე ტური და მეორე ტურში, რა თქმა უნდა, დარწმუნებული ვართ არჩევნების მოგებაში, - ამის შესახებ „ქართული ოცნების“ ცენტრალურ ოფისში გამართულ ბრიფინგზე პარტიის აღმასრულებელმა მდივანმა, ირაკლი კობახიძემ განაცხადა.

„ჩვენ ანალოგიური შედეგი ვაჩვენეთ 2016 წელს. მაშინაც იყო 48%-ზე მეტი და მაშინ, 2/3-ში დაგვჭირდა მეორე ტური. ამ შემთხვევაში, ხედავთ, რომ ნახევარ, ან უფრო ნაკლებ შემთხვევაში გვჭირდება მეორე ტური. როდესაც, დაახლოებით, 49%-იან მაჩვენებელს იღებ, ბუნებრივია, მაღალია იმის ალბათობა, რომ ნახევარში ან 2/3-ში მეორე ტურები დაგჭირდეს. ამ შემთხვევაში, ჩვენ, დაახლოებით, ოლქების ნახევარში დაგვჭირდება მეორე ტური“, - განაცხადა ირაკლი კობახიძემ.

ამ დროისთვის, ცენტრალურ საარჩევნო კომისიაში 3 847 უბნიდან დათვლილია მონაცემები 3 086 (80.22%) უბნის მიხედვით. ამ დროისთვის წინასწარი შედეგები შემდეგნაირად გამოიყურება: „ქართული ოცნება“ - 48.34%; „ნაციონალური მოძრაობა“ - 26,43%; „ევროპული საქართველო“ - 3,78%; „ლელო“ – 3,26%; „პატრიოტთა ალიანსი“ – 3,2%; „სტრატეგია აღმაშენებელი“ – 3,16%; „გირჩი“ – 3,06%; „ალეკო ელისაშვილი – მოქალაქეები“ – 1,4% და „ლეიბორისტული პარტია“ – 1%.