ლაშა ნაცვლიშვილი: იქნება უხეში პროვოკაციები, ძალადობის ინსპირირება, სამხარეო ადმინისტრაციებთან და „ოცნების“ საარჩევნო შტაბებთან მივარდნები
პოლიტიკა

ლაშა ნაცვლიშვილი
ფოტო: Facebook
ექსპრეზიდენტი მიხეილ სააკაშვილი არჩვენების გაყალბების, წინასარევოლუციო ისტერიის და ხელისუფლების იოლად ჩამოშლის ილუზიის შექმნას შეეცდება, - აცხადებს „ქართული ოცნების“ კონსულტანტი საზოგადოებასთან ურთიერთობის საკითხებში, ლაშა ნაცვლიშვილი.
მისი თქმით, სააკაშვილი ყველაფერს გააკეთებს, განსაკუთრებით, რეგიონებში - იქნება უხეში პროვოკაციები, ძალადობის ინსპირირება, სამხარეო თუ ადგილობრივ ადმინისტრაციებთან და „ოცნების“ საარჩევნო შტაბებთან მივარდნები. თუ გაუმართლა - შევარდნებიც.
„ეს ხომ სიგიჟეა, იტყვით თქვენ და რაციონალური ლოგიკიდან გამომდინარე, მართალიც იქნებით! მაგრამ მიშას მიაჩნია, რომ სწორედ თქვენ ხართ გიჟები, ვინც ასე არ ფიქრობთ! მისი აზროვნების და, რაც მთავარია, მოქმედების ტიპი, პრობლემების გადაწყვეტის ერთადერთი ფორმულა - გეომეტრიული პროგრესიით აღმავალი ესკალაციაა. ის ყველა შემთხვევაში წავა გამწვავებაზე. სხვა მეთოდს ის, უბრალოდ, არც ცნობს და არც იცნობს.
ისტერიული ესკალაციაა მისი ე.წ. „მოდუს ოპერანტი“ და ამ მეთოდს არც 2020-ის შემოდგომაზე უღალატებს - არჩევნების პირველადი შედეგების გამოცხადებისთანავე, მიშა იტყვის, რომ არჩევნები გაყალბდა და მოუწოდებს თავის მომხრეებს რევოლუციისკენ. არც ეგზიტპოლი შეაკავებს, არც ცესკო და არც ეუთო და ოდირი. მას საკუთარი სცენარი აქვს და არავის დაგიდევთ. აბა, გაბედოს ვინმემ ოპოზიციაში და არ დაემორჩილოს მის ბრძანებას. იგი ყველას ყველაფერს გაუხსენებს:
ბოკერიას გაუხსენებს, რომ ივანიშვილის სცენარით დაუშალა პარტია; ხაზარაძეს შეახსენებს, რომ მევახშეა; გირჩს და ვაშაძეს წამოაძახებს, რომ ბურჭულაძის პოლიტიკურად განადგურების სპეცოპერაციაში მონაწილეობა ივანიშვილის სასარგებლოდ მიიღეს; მაჭუტაძეს შეახსენებს, რომ... მაჭუტაძეა; ზოგს წამოაძახებს, რომ შევარდნაძის დროინდელია, ზოგს ზვიადისტს დაუძახებს, ზოგს კი - პუტჩისტს. ხო, მართლა, უგულავას შეახსენებს, რომ ციხიდან გამოსვლის სანაცვლოდ მას „დედა აგინა“.
თუმცა, არა! უგულავას არაფრის შეხსენება არ დასჭირდება. უგულავა ისედაც მასთან იქნება, ისევე როგორც გულისამრევი ოქრუაშვილი, ჭკნობამორეული მეძავი ლეიბორისტი და მიტოვებული ქალებისთვის დამახასიათებელი შურისძიების დაუძლეველი ვნებით აღსავსე, ბოღმით თვალ და გონებადაბინდული უმრწმესი ბერძენიშვილი და უქარქაშო გუბოზ სანიკიძე.
ეს ყველაფერი იქნება, მაგრამ არ იქნება მთავარი, არ იქნება რევოლუცია. იმისდა მიუხედავად, დაემორჩილება თუ არა მიშას დანარჩენი ოპოზიცია. მრავალი მიზეზის გამო არ იქნება, თუნდაც იმიტომ, რომ არ არის დაცული ყველა დროის ყველაზე წარმატებული რევოლუციონერის მიერ ჩამოყალიბებული ქრესტომათიული წინაპირობა იმის თაობაზე, რომ რევოლუციური სიტუაციისთვის აუცილებელია, ხალხს აღარ სურდეს ძველებურად ცხოვრება, ხოლო ხელისუფლებას აღარ შეეძლოს ძველებურად მართვა. ჩვენთან ყველაფერი პირიქით არის - ხალხის უმრავლესობა ხელისუებათან დგას და ხელისუფლებაც მყარია“, - აცხადებს ლაშა ნაცვლიშვილი.





