მცხეთა-მთიანეთის რეგიონში მოსახლეობის თერმოსკრინინგი დაიწყება

მცხეთა-მთიანეთის სახელმწიფო რწმუნებულმა უწყებათაშორისი საკოორდინაციო ჯგუფის წარმომადგენლებთან, ვიდეოკონფერენციის ფორმატში, მორიგი სამუშაო შეხვედრა გამართა და გახანგრძლივებული საგანგებო მდგომარეობის ფარგლებში, რეგიონში გასატარებელი ზომები განიხილა.

სამუშაო ჯგუფის წარმომადგენლებმა კორონავირუსის პრევენციისთვის დღემდე განხორციელებული ღონისძიებები შეაჯამეს.

მცხეთა-მთიანეთი ამ დრომდე, ე.წ. მწვანე ზონად რჩება, სადაც კოვიდ 19-ით ინფიცირების არც ერთი ფაქტი არ დადასტურებულა. კორონავირუსის შესაძლო გავრცელების პრევენციის მიზნით, რეგიონის მასშტაბით უახლოეს პერიოდში მოსახლეობის თერმოსკრინინგი დაიწყება. ასევე, დაგეგმილია ქოლ-ცენტრის ოფისის გახსნა ქალაქ მცხეთაში, სადაც მოქალაქეები ვირუსთან დაკავშირებით გაჩენილ კითხვებზე კომპეტენტურ პასუხს მიიღებენ. კორონავირუსის პრევენციული ღონისძიებების პარალელურად, მცხეთა-მთიანეთში საგაზაფხულო სამუშაოებიც გრძელდება.

საქართველოში კორონავირუსი 425 ადამიანს დაუდასტურდა, აქედან 111 უკვე გამოჯანმრთელდა, 5 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში გადმოიყვანეს.

კარანტინის რეჟიმში - 5126 ადამიანი იმყოფება, ხოლო სტაციონარში მეთვალყურეობის ქვეშ - 578, - ამის შესახებ ინფორმაციას stopcov.ge ავრცელებს.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.