ირაკლი კობახიძე: გიგა ბოკერიამ პრაქტიკულად აღიარა, რომ მათი ორგანიზებულია მარნეულის აქცია და ამ მძიმე ქმედებას მკაცრი პასუხი უნდა გაეცეს

არანაირი დადანაშაულება არის საჭირო, ყველაფერი არის ნათელი, ყველაფერს ნათელი პასუხი გასცა თვითონ გიგა ბოკერიამ, რომელმაც პრაქტიკულად აღიარა მათი პირდაპირი ჩართულობა ამ აქციის ორგანიზებაში - ამის შესახებ პარლამენტის ყოფილმა თავმჯდომარემ ირაკლი კობახიძემ „დღის ქრონიკის“ ეთერში განაცხადა.

მისივე თქმით, აქციის მოწყობით შეიქმნა ვირუსის ხელოვნური კერა და ასეთ მძიმე დანაშაულებრივ ქმედებას შესაბამისი, მკაცრი პასუხი უნდა გაეცეს.

„გარდა ამისა შეგახსენებთ, რომ „ნაციონალური მოძრაობის“ ორივე განშტოების ლიდერები, როგორც სულეიმანოვი ასევე იმან ულიევი, პირდაპირ იყვნენ ჩართული ამ აქციის ორგანიზებაში და ისინი უშუალოდ მონაწილეობდნენ ამ აქციაში, როგორც ლიდერები. გარდა ამისა თქვენ ნახეთ, როგორ სკანდირებდნენ ისინი აქციის მსვლელობისას. ყველაფერი იყო დღესავით ნათელი. იყო პოლიტიკური აქცია და ამ პოლიტიკური აქციის მიზნები არის ძალიან მკაფიო. იმ პირობებში, როდესაც ადამიანები, პირდაპირი მნიშვნელობით, იბრძვიან სიცოცხლისთვის, როდესაც გვყავს ასობით ინფიცირებული და ექიმები არიან ჩართულები მთელი მონდომებით ამ საქმეში და ამ პირობებში კეთდება ისეთი რამ, რაც ქმნის ხელოვნურ კერას ეპიდემიის. ეს არის ძალიან მძიმე ქმედება. ამ მძიმე ქმედებას რა თქმა უნდა მკაცრი პასუხი უნდა გაეცეს. დაუშვებელია ასეთი ტიპის საბოტაჟის მოწყობა საკუთარი მოქალაქეების წინააღმდეგ. სამწუხაროდ ეს პოლიტიკური ძალა არ ისლის ასეთ ქმედებებს. დღესაც ამის მორიგი გამოვლინება ვნახეთ ჩვენ მარნეულში“, - განაცხადა ირაკლი კობახიძემ.

მარნეულში მოსახლეობა საპროტესტო აქციას მართავს. მოსახლეობა მარნეულში საგანგებო მდგომარეობის პირობებში შექმნილ შეზღუდვებს აპროტესტებს.