ირანული მედია: საქართველოს პრეზიდენტმა 3 ირანელი პატიმარი შეიწყალა

ირანის საგარეო საქმეთა მინისტრის, ჯავად ზარიფის თბილისში ვიზიტის შემდეგ, საქართველოს პრეზიდენტმა გიორგი მარგველაშვილმა სამი ირანელი პატიმარი შეიწყალა. ამის შესახებ ინფორმაციას 1tv.ge ირანულ სახელმწიფო საინფორმაციო სააგენტო IRNA-ზე დაყრდნობით წერს.

ირანული მედიის ცნობით, პრეზიდენტ მარგველაშვილთან შეხვედრაზე ზარიფი ირანელი პატიმრების გათავისუფლების თემას შეეხო.

"ვიზიტს მოჰყვა პირველი შედეგი - ქართულმა მხარემ დაიწყო შეწყალებისა და გათავისუფლების პროცესი", - წერს IRNA.

სააგენტოს ცნობით, ეს ნაბიჯი ქვეყნებს შორის ორმხრივი ურთიერთობის განვითარებისკენაა მიმართული.

ირანის საგარეო საქმეთა მინისტრი საქართველოში ოფიციალური ვიზიტით 17-18 აპრილს იმყოფებოდა. მოჰამედ ჯავად ზარიფი საქართველოს პრეზიდენტს, პრემიერმინისტრს, საგარეო საქმეთა და ეკონომიკის მინისტრებს შეხვდა.