რასმუსენი: თუ გადაწყვეტთ, რომ მეხუთე მუხლი ოკუპირებულ ტერიტორიებზე არ გავრცელდეს, ჩვენ შეგვიძლია პროცესის დაწყება

კარგად მესმის, რომ საქართველოში ბევრ ადამიანს მოთმინება ამოეწურა. შეგახსენებთ, 2008 წლის ბუქარესტის სამიტზე მიღებული გადაწყვეტილება, რომ საქართველო და უკრაინა გახდებიან ნატო-ს წევრები, ძალაშია, - ამის შესახებ ნატო-ს ყოფილმა გენერალურმა მდივანმა, ანდერს ფოგ რასმუსენმა თბილისში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ, რიგით მეხუთე საერთაშორისო კონფერენციაზე განაცხადა.

რასმუსენს დაუსვეს შეკითხვა, რომ საქართველო უკვე 11 წელია იღებს ნატო-სგან ყოველწლიურ ეროვნულ გეგმას და რა შეიცვალა, ნატო-ში გასაწევრიანებლად სჭირდება თუ არა ქვეყანას კიდევ MAP-ი. მისი თქმით, საქართველოსთვის MAP-ის მინიჭების საკითხი ბუქარესტის სამიტამდე განიხილეს.

„ბუქარესტის სამიტამდე ჩვენ განვიხილავდით, მიგვეცა თუ არა MAP-ი საქართველოსა და უკრაინისთვის. ჩვენ ვერ მივაღწიეთ ამისთვის საჭირო მხარდაჭერას. როგორც იცით, ნატო-ში გადაწყვეტილებები მხოლოდ ერთხმად მიიღება, ხოლო საქართველოსა და უკრაინისთვის MAP-ის მინიჭებაზე გარკვეული წინააღმდეგობა იყო. ამიტომ ჩვენ გადავწყვიტეთ, რომ თქვენ გახდებით ნატო-ს წევრი. ეს გზავნილი უფრო ძლიერია, რადგან წევრობის სამოქმედო გეგმა არ ითვალისწინებს გარანტიას, რომ თქვენ გახდებით წევრი. თუმცა ჩვენ გადავწყვიტეთ, რომ საქართველო და უკრაინა გახდებიან წევრები“, - განაცხადა რასმუსენმა.

მისი თქმით, შეიქმნა ნატო-საქართველოს და ნატო-უკრაინის კომისია და რეფორმებზე მუშაობა ამ კომისიების ფარგლებში გრძელდება. „ეს პროცესი კარგად მიდის. თუმცა დარწმუნებული ვარ, რომ 2008 წელს ჩვენ არასწორად მოვიქეცით. მე მხარს ვუჭერდი საქართველოსა და უკრაინისთვის წევრობის სამოქმედო გეგმის მინიჭებას. ვფიქრობ, ჩვენ ეს უნდა გაგვეკეთებინა. ჩვენ პუტინს არასწორი გზავნილი გავუგზავნეთ. ეს იყო მერყევობის, სიმტკიცის ნაკლებობის გზავნილი და მან გამოიყენა ეს სიტუაცია. მე ვხედავ მკაფიო კავშირს 2008 წლის აპრილის სამიტზე ნატო-ს მერყევობასა და 2008 წლის აგვისტოში საქართველოზე თავდასხმას შორის. მას სურდა მკაფიო გზავნილის გაგზავნა საქართველოსა და ნატოსთვის - ნუ ჩაერევით ჩვენს სამეზობლოში. ასე რომ, ვფიქრობთ, ჩვენ შეგვეძლო ამის თავიდან აცილება, საქართველოსა და უკრაინისთვის MAP-ის მინიჭებით. თუმცა ეს არ გავაკეთეთ“, - აღნიშნა რასმუსენმა.

მისივე თქმით, თუ ქართველები გადაწყვეტენ, რომ მეხუთე მუხლი ოკუპირებულ ტერიტორიებზე არ გავრცელდეს, ნატოს შეუძლია ამის მიღება და პროცესის დაწყება.

„ახლა იმ წევრებისთვის, რომლებიც თავს იკავებენ, ადვილია თქმა, რომ საქართველოს აქვს გადაუწყვეტელი სასაზღვრო საკითხები რუსეთთან. ჩვენ არ შეგვიძლია საქართველოსთვის უსაფრთხოების გარანტიების მიცემა და მეხუთე მუხლის მთელ საქართველოზე გავრცელება. ვფიქრობ, პირველი ნაბიჯი ამ საკითხზე მსჯელობისთვის საქართველოში უნდა გადაიდგას და შემდეგ უნდა წავიდეს ნატო-ში. თუ თქვენ კითხულობთ ყოველწლიურ პროგრამებს, საქართველო თითქმის ყველა პირობას ასრულებს, მაგრამ ჯერ კიდევ გაქვთ პრობლემები საზღვრებთან დაკავშირებით. მაგრამ ამავე დროს, ჩვენ ვერ მივცემთ პუტინს ვეტოს უფლებას, ეს მან არ უნდა გადაწყვიტოს, შეუერთდება თუ არა საქართველო ნატო-ს. ეს საქართველოს მთავრობის და ნატო-ს საბჭოზეა დამოკიდებული“, - განაცხადა ნატო-ს ყოფილმა გენერალურმა მდივანმა.

ნატოს წესდების მე-5 მუხლის თანახმად, ნატოს რომელიმე წევრ ქვეყანაზე თავდასხმა მთელ ალიანსზე თავდასხმად ფასდება.

ანდერს ფოგ რასმუსენი თბილისში მიმდინარე საერთაშორისო კონფერენციაში მონაწილეობს. 50-ზე მეტ საერთაშორისო დელეგატს და 500-მდე სტუმარს უკვე მეორე დღეა, საქართველო, ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ საერთაშორისო კონფერენციაზე მასპინძლობს.

მას მაღალი რანგის დიპლომატები, საერთაშორისო ექსპერტები და საქართველოს მთავრობის წევრები ესწრებიან. ნატოს საკითხზე გამომსვლელებს შორისაა მაკკეინის ინსტიტუტის აღმასრულებელი დირექტორი კურტ ვოლკერიც.