CEU-ს ქართველი კურსდმთავრებულები ვიქტორ ორბანს საპროტესტო აქციით დახვდებიან

საქართველოს უნგრეთის პრემიერმინისტრი, ვიქტორ ორბანი ეწვევა. ვიზიტი უნგრეთში "ცენტრალური ევროპის უნივერსიტეტის" (CEU) შესაძლო დახურვის ფაქტს დაემთხვა.
 
"ცენტრალური ევროპის უნივერსიტეტი" ჯორჯ სოროსის ფონდმა პოსტსაბჭოთა ბუდაპეშტში 1991 წელს დააარსა. უნგრეთის პარლამენტმა 3 აპრილს, განათლების შესახებ კანონში ცვლილებები დაამტკიცა, რომლის თანახმად სოროსის უნივერსიტეტის დახურვა შესაძლებელი გახდა. გავრცელებული მოსაზრებით, ამ მიზნის მიღწევას ორბანის მმართველი პარტია უნგრეთში დიდი ხნის განმავლობაში ცდილობდა.

11 აპრილს უნგრეთის პრეზიდენტმა იანოშ ადერმა უცხოური უნივერსიტეტების შესახებ კანონში ცვლილებებს ხელი მოაწერა და ის ძალაში შევიდა. შესაბამისად, "ცენტრალური ევროპის უნივერსიტეტი" შეიძლება დაიხუროს.

ამ ფაქტს უნგრეთში საპროტესტო აქციები მოჰყვა. CEU-ს დახურვას უნივერსიტეტის ქართველი კურსდამთავრებულებიც აპროტესტებენ და ვიქტორ ორბანის ვიზიტის დროს თბილისში აქციას სოციალური ქსელით აანონსებენ. 

"სწორედ მისი პირადი სურვილი და ახირებაა CEU-ს დახურვა და უნგრეთიდან გაძევება. გთხოვთ, მოხვიდეთ და ვაჩვენოთ მას, რომ ჩვენ არ ვართ გულგრილი. ჩვენ, CEU-ს ქართველი კურსდამთავრებულები, შევიკრიბებით ქორთიარდ მერიოტთან (თავისუფლების მოედანზე), სადაც ორბანის მისვლაა დაგეგმილი, რათა ვაჩვენოთ, რომ ის და მისი გადაწყვეტილება მარტო უნგრეთის პრობლემა არაა. შემოგვიერთდით, ვისაც გაღელვებთ დემოკრატია, ღიაობა და აკადემიური თავისუფლება!,“ - ნათქვამია განცხადებაში, რომელსაც ერთ-ერთი კურსდამთავრებული საკუთარ გვერდზე აქვეყნებს. 

ორბანის დაგეგმილ ვიზიტს წინ უნგრეთის საგარეო საქმეთა და ვაჭრობის მინისტრის, პიტერ სიიარტოს თბილისში სტუმრობა უსწრებდა. მან საქართველოს დედაქალაქი 18 აპრილს დატოვა. მან უნგრეთში ქართველი სტუდენტებისთვის ყოველწლიურად 50-მდე სტიპენდიის გაცემის შესახებ გადაწყვეტილებაზე ისაუბრა.