დიდი ბრიტანეთის მინისტრი Brexit-ის საკითხებში თანამდებობიდან გადადგა

დიდ ბრიტანეთში Brexit-ზე პასუხისმგებელი მინისტრი დევიდ დევისი თანამდებობიდან გადადგა. ამის შესახებ პრემიერის კანცელარიის მონაცემებზე დაყრდნობით Bloomberg-ი წერს.

ბრიტანული მედიის ცნობით, მინისტრის გადადგომის მიზეზი დევიდ დევისსა და პრემიერ ტერეზა მეის შორის აზრთა სხვადასხვაობა გახდა იმის შესახებ, თუ როგორი ურთიერთობები უნდა შეინარჩუნოს დიდმა ბრიტანეთმა ევროკავშირთან Brexit-ის შემდეგ.

Bloomberg-ის ცნობით, თანამდებობა დატოვა აგრეთვე დევისი მოადგილემაც.

დიდი ბრიტანეთის მინისტრთა კაბინეტმა Brexit-ის შესახებ კოლექტიურ შეთანხმებას 6 ივლისს მიაღწია. ოფიციალური ლონდონი იმედოვნებს რომ კოლექტიური გეგმა ევროკავშირთან ლონდონის მოლაპარაკების შემდეგ ეტაპზე გადასვლას შეუწყობს ხელს.

დიდი ბრიტანეთი ევროკავშირს 2019 წლის 29 მარტს დატოვებს. Brexit-ის საბოლოო პირობები შემოდგომაზე უნდა შეთანხმდეს.

გაერთიანებული სამეფოს ევროკავშირიდან გასვლის შესახებ რეფერენდუმი 2016 წლის 23 ივნისს ჩატარდა. ამ გადაწყვეტილებას მხარი დაუჭირა პლებისციტში მონაწილე მოქალაქეების ნახევარზე მეტმა, რის შემდეგაც მაშინდელი პრემიერმინისტრი დევიდ კამერონი გადადგა - ის ევროკავშირიდნ გასვლას ეწინააღმდეგებოდა. მისი ადგილი ტერეზა მეიმ დაიკავა.

ლონდონსა და ბიუსელს შორის Brexit-ის პირობების შესახებ ოფიციალური მოლაპარაკებები გასული წლის 19 ივნისს დაიწყო. დიდი ბრიტანეთის პრემიერმინისტრმა, ტერეზა მეიმ ქვეყნის ევროკავშირიდან გასვლის პროცედურის შესახებ დოკუმენტს ხელი 29 მარტს მოაწერა.