ჯარედ კუშნერი: უკრაინასა და რუსეთს შორის მოლაპარაკებებში ახალი იდეები გამოიკვეთა, ზოგიერთმა მათგანმა შესაძლოა, მოლაპარაკებებში გარღვევა გამოიწვიოს

ჯარედ კუშნერმა სოციალურ ქსელში დაწერა, რომ აშშ მჭიდრო კონსულტაციებს განაგრძობს რუსეთთან, უკრაინასა და ევროპელ პარტნიორებთან.

როგორც აშშ-ის პრეზიდენტის სპეციალურმა წარმომადგენელმა განაცხადა, დისკუსიებისას რამდენიმე ახალი იდეა გამოიკვეთა, ზოგიერთმა მათგანმა კი შესაძლოა, მოლაპარაკებებში გარღვევა გამოიწვიოს.

მისივე თქმით, ომის შედეგად ადამიანური დანაკარგები მძიმეა, საკითხები კი განსაკუთრებით რთული.

„როგორც პრეზიდენტმა ტრამპმა არაერთხელ განაცხადა, მდგრადი მშვიდობის მისაღწევად უკრაინისთვის სანდო უსაფრთხოების გარანტიები და ომის შემდგომი უსაფრთხოების დეტალური, პრაქტიკული მექანიზმებია საჭირო, რომლებიც ახალი ომის დაწყების რისკს შეამცირებს. ნატო ევროპის უსაფრთხოების მნიშვნელოვან საყრდენად დარჩება. ამასთან, საჭიროა სამხედრო თანამშრომლობის, კომუნიკაციის, კონფლიქტის თავიდან აცილებისა და დაძაბულობის ურთიერთშესამცირებლად მიმართული მექანიზმების გაძლიერება.

ნებისმიერი საბოლოო შეთანხმება შესაბამისმა მხარეებმა უნდა დაამტკიცონ. პრეზიდენტი ტრამპი მხარს დაუჭერს მხოლოდ ისეთ შეთანხმებებს, რომლებიც გააძლიერებს უკრაინისა და ევროპის უსაფრთხოებას და მომავალში კონფლიქტის ალბათობას შეამცირებს.

ამ ომს უმძიმესი ადამიანური მსხვერპლი მოაქვს, ხოლო არსებული საკითხები უკიდურესად რთულია. ამის მიუხედავად, ჩვენ განზრახული გვაქვს, გავაგრძელოთ რთული სამუშაო, შევინარჩუნოთ მოლაპარაკებებისთვის აუცილებელი კონფიდენციალურობა და ვიპოვოთ გზა ამ საშინელი ომის დასასრულებლად და ხანგრძლივი მშვიდობის დასამყარებლად“, - წერს კუშნერი.