POLITICO: აბუ-დაბიში უკრაინის სამშვიდობო მოლაპარაკებების პირველ დღეს, ევროპელმა წარმომადგენლებმა შეერთებულ შტატებთან ერთად კონტინენტის ზოგადი უსაფრთხოების არქიტექტურის გადახედვაზე მიაღწიეს შეთანხმებას, რათა მინიმუმამდე დაიყვანონ დაძაბულობა რუსეთსა და ნატოს მოკავშირეებს შორის

აბუ-დაბიში უკრაინის სამშვიდობო მოლაპარაკებების პირველ დღეს, ევროპელმა წარმომადგენლებმა შეერთებულ შტატებთან ერთად კონტინენტის ზოგადი უსაფრთხოების არქიტექტურის გადახედვაზე მიაღწიეს შეთანხმებას, რათა მინიმუმამდე დაიყვანონ დაძაბულობა რუსეთსა და ნატოს მოკავშირეებს შორის, - წერს გამოცემა POLITICO.

აშშ-ის სპეციალური წარმომადგენლის, სტივ უიტკოფისა და ევროპული საბჭოს მიერ გავრცელებული განცხადების თანახმად, უკრაინა და მისი ევროპელი პარტნიორები ამერიკულ მხარესთან ერთად შეთანხმდნენ, რომ „არსებითია“ რეგიონში „ომისშემდგომი უსაფრთხოების გამოწვევების“ მოგვარება და „კონფლიქტის რისკის“ შემცირება.

„საერთო მიზანია პრაქტიკული და ურთიერთშემავსებელი უსაფრთხოების ჩარჩოს შემუშავება, რომელიც გააძლიერებს უკრაინის გრძელვადიან უსაფრთხოებას და შექმნის მოლაპარაკებული შეთანხმების მისაღწევად აუცილებელ ნდობას“, - ნათქვამია ორ განცხადებაში. - „ხანგრძლივ მშვიდობაზე ძირითადი ფოკუსირების პარალელურად, განხილვა შეეხო იმას, თუ როგორ უნდა მოხდეს არსებული ევროპული უსაფრთხოების ინსტიტუტებისა და შეთანხმებების გაძლიერება და განვითარება უკრაინაში ომის დასრულების შემდეგ“.

ევროპის მომავალი უსაფრთხოების არქიტექტურის საკითხი ევროპული მთავრობებისთვის განსაკუთრებით მგრძნობიარეა, რადგან ისინი შიშობენ, რომ ნატოელი მოკავშირეების წლების განმავლობაში კრიტიკისა და თავდასხმების შემდეგ, პრეზიდენტი დონალდ ტრამპი შესაძლოა ემზადებოდეს რეგიონში ამერიკული მხარდაჭერის რადიკალურად შესამცირებლად.