AXIOS: აშშ-ის არმიის გენერალ-ლეიტენანტმა აღიარა, რომ ერთი წლის განმავლობაში მედიასაშუალებებს უკრაინისა და ირანის შესახებ საიდუმლო ინფორმაცია გადასცემდა

აშშ-ის არმიის გენერალ-ლეიტენანტმა ბრეტ სილვიამ აღიარა, რომ ერთი წლის განმავლობაში ორი სხვადასხვა მედიასაშუალების ჟურნალისტებს უკრაინისა და ირანის შესახებ საიდუმლო ინფორმაცია გადასცა. ინფორმაციას AXIOS-ი პენტაგონის შიდა გამოძიების ანგარიშსა და საქმის კურსში მყოფ ამერიკელ ოფიციალურ პირებზე დაყრდნობით ავრცელებს.

როგორც გამოცემა აღნიშნავს, სილვია თავდაცვის მდივანმა პიტ ჰეგსეტმა მიმდინარე კვირას დაითხოვა. ამერიკელი ოფიციალური პირის განცხადებით, სამხედრო მოსამსახურემ საიდუმლო ინფორმაციის გაჟონვა ვიდეოჩანაწერზე აღიარა, მას შემდეგ, რაც პოლიგრაფიული ტესტის ოთხჯერ გავლა ვერ შეძლო.

„მას რამდენიმე პოლიგრაფიული შემოწმების წარმატებით გავლა გაუჭირდა“, - ნათქვამია ანგარიშში.

დოკუმენტის თანახმად, გენერალს მედიასთან ინფორმაციის უნებართვო გამჟღავნებაში ადანაშაულებენ. ამასთან, ანგარიშში აღნიშნულია, რომ სილვია ჟურნალისტებთან ურთიერთობის შესახებ კითხვებზე პასუხის გაცემისას თანამშრომლობდა და პირადი ტელეფონიც წარმოადგინა, რათა მისი ციფრული ექსპერტიზა ჩატარებულიყო.

ანგარიშისა და ამერიკელი ოფიციალური პირების ცნობით, სილვიამ საიდუმლო ინფორმაციის ჟურნალისტებისთვის გადაცემა ჯერ კიდევ 2025 წლის ივნისში დაიწყო - იქამდე, სანამ პენტაგონიდან წამყვანი მედიასაშუალებების წარმომადგენლებს აკრედიტაციებს შეუჩერებდნენ. ამის შემდეგ კი ჟურნალისტებთან კავშირისთვის დაშიფრულ Signal-ს იყენებდა. ერთ-ერთი შეხვედრა ვირჯინიის შტატის ქალაქ არლინგტონში, რესტორან Silver Diner-ში გაიმართა.

დოკუმენტის თანახმად, რესტორანში შეხვედრისას სილვიამ საიდუმლო დოკუმენტის გაცნობის დროს გაკეთებული ჩანაწერები გამოიყენა და ჟურნალისტს უკრაინისთვის აშშ-ის დახმარების შესახებ ინფორმაცია ზეპირად გადასცა.

ანგარიშში აღნიშნულია, რომ ჟურნალისტი წიგნზე მუშაობდა და გენერალს ორჯერ შეხვდა. ამასთან, სილვიას ეს შეხვედრები პენტაგონის საზოგადოებასთან ურთიერთობის სამსახურთან არ შეუთანხმებია და ჟურნალისტისთვის ინფორმაციის მიწოდებამდე მისი გადამოწმებაც არ მოუთხოვია.

ამერიკელი ოფიციალური პირები ეჭვობენ, რომ სილვიამ ერთ-ერთ ჟურნალისტთან Signal-ში მიმოწერის კვალი განზრახ წაშალა, თუმცა მომხდარი შემთხვევით წაშლად წარმოაჩინა.

„ივნისში ან ივლისში სილვიამ Signal-ზე [საიდუმლო პირისგან] შეტყობინებები მიიღო. სილვიას ზუსტად არ ახსოვს, რა ეწერა შეტყობინებაში, თუმცა ფიქრობს, რომ ის ირანს ეხებოდა“, - ნათქვამია ანგარიშში.

დოკუმენტის მიხედვით, გენერალმა განაცხადა, რომ შეტყობინებას არ უპასუხა და მისი წაშლა გადაწყვიტა. ამ პროცესში კი, როგორც თავად ამბობს, მთელი მიმოწერა წაშალა. შედეგად, პირადი ტელეფონიდან გაქრა როგორც Signal-ის შეტყობინებები, ისე ზარების ჩანაწერები.

კიდევ ერთ შემთხვევაში, ანგარიშის თანახმად, სილვიამ აღიარა, რომ ის იყო ერთ-ერთი იმ 20 ოფიციალურ პირს შორის, რომლებიც პენტაგონის ხელმძღვანელობის კრიტიკულ სტატიაში იყვნენ ნახსენები.