მედია: საფრანგეთის პოლიციამ პარიზის ცენტრში დაგეგმილი მსვლელობა აკრძალა - დემონსტრანტების წინააღმდეგ ხმოვანი ყუმბარების გამოყენებაც ნებადართულია

საფრანგეთში დღეს დაგეგმილი მასშტაბური საპროტესტო აქციების წინ პოლიციამ პარიზის ცენტრში მსვლელობა აკრძალა. ინფორმაციას ფრანგული მედია ავრცელებს.

ამასთან, მედიის ცნობით, შინაგან საქმეთა მინისტრმა ლორან ნუნიესმა სამართალდამცველებს დემონსტრაციების დროს ხმოვანი ყუმბარების გამოყენების უფლება მისცა, თუ ვითარება განსაკუთრებით მძიმე ძალადობაში გადაიზრდება.

პარიზის პოლიციის უფროსის პატრის ფოს ბრძანებით, დემონსტრაციების ჩატარება აიკრძალა ელისეს სასახლის, პრემიერ-მინისტრის ოფისისა და ელისეს მინდვრების გამზირის მიმდებარე ტერიტორიებზე, ასევე დედაქალაქის სხვა მნიშვნელოვან ადგილებში.

პოლიციამ პარიზის ცენტრში დაგეგმილი მასშტაბური მსვლელობაც აკრძალა. აქციის ორგანიზატორებთან ალტერნატიული მარშრუტის შესახებ მოლაპარაკებები უშედეგოდ დასრულდა. თავდაპირველი გეგმით, დემონსტრაცია ადგილობრივი დროით 14:00 საათზე რესპუბლიკის მოედანზე უნდა დაწყებულიყო და დედაქალაქის ჩრდილოეთ ნაწილისკენ გაგრძელებულიყო.

აქციის ორგანიზატორების მიერ შექმნილ ვებგვერდზე საფრანგეთის მასშტაბით დაგეგმილი 600-ზე მეტი დემონსტრაციაა მითითებული.

საპროტესტო გამოსვლების წინ შინაგან საქმეთა მინისტრმა ლორან ნუნიესმა ტელეარხ France 2-თან განაცხადა, რომ სამართალდამცველებს ხმოვანი ყუმბარების გამოყენება შეეძლებათ „განსაკუთრებით მძიმე ურბანული ძალადობის“ შემთხვევაში.

მინისტრს მანამდე მათი გამოყენება მოსწავლეთა საპროტესტო აქციების დროს დროებით შეჩერებული ჰქონდა. გადაწყვეტილება მას შემდეგ მიიღეს, რაც პოლიციის მიერ გასროლილი ხმოვანი ყუმბარის აფეთქების შედეგად 15 წლის მოზარდმა ხელის მტევანი დაკარგა.

საპროტესტო აქციები საფრანგეთში ბოლო კვირების განმავლობაში იმართება. მოსწავლეებისა და სტუდენტების პროტესტს ახლა ცხოვრების გაძვირების წინააღმდეგ მიმართული გამოსვლებიც მოყვა. აქციებში მონაწილეობას გეგმავენ ე.წ. „ყვითელი ჟილეტების“ მოძრაობის წევრები, დასაქმებულები, პენსიონერები და ფერმერები.

ხელისუფლება შიშობს, რომ სხვადასხვა საპროტესტო მოძრაობის გაერთიანებამ შესაძლოა დაპირისპირება და ძალადობა გამოიწვიოს.