ტრამპის განცხადებით, მისთვის ნობელის პრემიის არმინიჭებით, ნორვეგიამ საკუთარ თავს „წარუშლელი ლაქა“ დაასვა

აშშ-ის პრეზიდენტმა დონალდ ტრამპმა კიდევ ერთხელ გააკრიტიკა ნობელის მშვიდობის პრემიის მისთვის არმინიჭების გადაწყვეტილება და განაცხადა, რომ ამით ნორვეგიამ, სადაც ნობელის კომიტეტი მუშაობს, საკუთარ თავს „წარუშლელი ლაქა“ დაასვა. ინფორმაციას Reuters-ი ავრცელებს.

ტრამპმა ნორვეგიის მისამართით მწვავე განცხადებები მას შემდეგ გააკეთა, რაც ნობელის კომიტეტმა წლევანდელი პრემია ნავი პილაის მიანიჭა. პილაი სისხლის სამართლის საერთაშორისო სასამართლოს ყოფილი მოსამართლეა, რომელიც გაეროს ანგარიშის მომზადებას ხელმძღვანელობდა. ანგარიშის თანახმად, ისრაელმა ღაზის სექტორში გენოციდი ჩაიდინა.

ნიუ-იორკის შტატის ქალაქ სირაკიუზში, საარჩევნო მიტინგზე გამოსვლისას, ტრამპმა პილაის „უცნობი პიროვნება“ უწოდა.

„ამ ადამიანის შესახებ არასდროს მსმენია. არც არავის სმენია“, - განაცხადა აშშ-ის პრეზიდენტმა.

პრეზიდენტობის ყოველ წელს ტრამპი იმედგაცრუებას გამოხატავდა იმის გამო, რომ ნობელის მშვიდობის პრემია არ მიუღია, იუწყება Reuters-ი.

„ეს წარუშლელი ლაქაა ნორვეგიისთვის და იმ ადამიანებისთვის, რომლებმაც ასეთი სამარცხვინო და უხერხული გადაწყვეტილება მიიღეს“, - განაცხადა ტრამპმა.

მან ჩამოთვალა რამდენიმე კონფლიქტი, რომელთა მოგვარებაშიც, მისი მტკიცებით, მონაწილეობა მიიღო. ტრამპის თქმით, მან ხელი შეუწყო ომის თავიდან აცილებას ჩრდილოეთ და სამხრეთ კორეას, იაპონიასა და ჩრდილოეთ კორეას, ასევე ჩინეთსა და ტაივანს შორის. ამ განცხადებების დასადასტურებლად მას კონკრეტული მტკიცებულებები არ წარმოუდგენია.

„ნობელის მშვიდობის პრემიამ სამუდამოდ დაკარგა სანდოობა რამდენიმე რადიკალი იდეოლოგის გამო, რომლებიც დემოკრატიის წინააღმდეგ გამოდიან და, ფაქტობრივად, ცივილიზაციის მტრები არიან. ჩვენ ეს არ დაგვავიწყდება, ნორვეგია“, - განაცხადა ტრამპმა.