Bloomberg: ექსპორტიორებმა ჰორმუზის სრუტის გავლით ნავთობის საიდუმლო მიწოდებ ააწყვეს

ახლო აღმოსავლეთის ქვეყნების ნავთობის ექსპორტიორებმა ჰორმუზის სრუტის გავლით ფარული მიწოდება ააწყვეს, - წერს Bloomberg-ი. გამოცემა აღნიშნავს, რომ ეს ნავთობის მსოფლიო ფასების ბარელზე 80-90 დოლარის დონეზე შენარჩუნებას უწყობს ხელს.

ნავთობი გადააქვთ გემებით, რომლებსაც ტრანსპონდერები გამორთული აქვთ, შემდეგ კი ომანის ყურეში ტანკერებზე გადააქვთ, რათა შემდგომში ტრანსპორტირება უზრუნველყონ.

როგორც Bloomberg-ი აღნიშნავს, ფარული მიწოდების მასშტაბებზე Sentinel 1-ის თანამგზავრული ფოტოები მოწმობს. 11 აგვისტოს გადაღებულ სურათებზე ომანის სანაპიროსთან სხვადასხვა ზომის დაახლოებით 150 გემი ჩანს. იანვარში ამ რაიონში მხოლოდ 40-მდე გემი იმყოფებოდა.

ამ გზით ტრანსპორტირებული ნავთობის ზუსტი რაოდენობა უცნობია. გამოცემის წყაროებმა მხოლოდ ის თქვეს, რომ დღე-ღამეში „4 მილიონ ბარელზე მეტი ნავთობი“ გადაიზიდება.

აშშ-ის ენერგეტიკის სამინისტროს ხელმძღვანელმა კრის რაიტმა მანამდე განაცხადა, რომ აგვისტოს დასაწყისში ჰორმუზის სრუტე, ბლოკადის მიუხედავად, დღე-ღამეში დაახლოებით 9 მილიონმა ბარელმა ნავთობმა გაიარა. ეს არის იმ მოცულობის დაახლოებით ნახევარი, რომლის ტრანსპორტირებაც ჰორმუზის სრუტის გავლით აშშ-ისა და ისრაელის ირანთან ომის დაწყებამდე ხორციელდებოდა.

აშშ-ისა და ისრაელის ირანთან ომის დაწყებამდე ჰორმუზის სრუტეზე ნავთობის მსოფლიო ტრანზიტის 20%-მდე გადიოდა. ომის დაწყების შემდეგ ირანმა სრუტე გემების გადაადგილებისთვის ჩაკეტა, რამაც ნავთობის მსოფლიო ფასების მკვეთრი ზრდა გამოიწვია. აშშ-მა, თავის მხრივ, საზღვაო ბლოკადა დააწესა და ირანის პორტებში გემებს არ უშვებს.