პედრო სანჩესი შენგენის ზონიდან ესპანეთის შესაძლო გარიცხვას ეხმაურება: სოლიდარობა არჩევითია, ევროპული ხელშეკრულებების პატივისცემა კი - სავალდებულო

ესპანეთის პრემიერ-მინისტრი, პედრო სანჩესი გამოეხმაურა იმ ევროპული ქვეყნების მოთხოვნას, რომლებიც სეუტაში შექმნილი მძიმე ვითარების გამო ესპანეთთან შენგენის ზონის ჩაკეტვას ითხოვენ.

სოციალურ ქსელ X-ში გამოქვეყნებულ პოსტში სანჩესმა აღნიშნა, რომ სოლიდარობა და ემპათია ნებაყოფლობითია, ხოლო ევროპული ხელშეკრულებებისა და ოფიციალური მონაცემების პატივისცემა - სავალდებულო.

ესპანეთის მთავრობის ხელმძღვანელმა ხაზგასმით აღნიშნა, რომ ახლა ხალხის დაყოფის დრო არ არის და ევროკავშირმა ძალისხმევა ძლიერი და ერთიანი ევროპის მშენებლობისკენ უნდა მიმართოს.

შენგენის ზონაში ესპანეთის წევრობის დროებით შეჩერებას შვედეთი, ფინეთი, დანია და იტალია ითხოვენ.

საკუთარი პოზიციის გამყარების მიზნით, სანჩესმა ევროპული სასაზღვრო და სანაპირო დაცვის სააგენტოს, Frontex-ის 2021-2026 წლების ოფიციალური სტატისტიკა მოიყვანა. ამ მონაცემების თანახმად, აღნიშნულ პერიოდში იტალიაში 478 600 არალეგალური შესვლა დაფიქსირდა, დასავლეთ ბალკანეთის მარშრუტით ევროკავშირში 340 600 მიგრანტი შევიდა, საბერძნეთში - 259 800, ხოლო ესპანეთში - 234 760.