Le Figaro: 11 თვე გავიდა მას შემდეგ, რაც ტრამპის ინაუგურაცია შედგა - 11 თვე, რომლის განმავლობაშიც მან ევროკავშირზე შეტევები გაახშირა, პირველ რიგში, ეს იყო პოლიტიკური თავდასხმები

დონალდ ტრამპის ინაუგურაციიდან თერთმეტი თვის შემდეგ, ევროკავშირი განმეორებითი თავდასხმების ობიექტი ხდება, განსაკუთრებით ციფრულ სფეროში, სადაც თეთრმა სახლმა და სილიკონის ველმა უპრეცედენტო ალიანსი შეკრეს, - წერს ფრანგული გაზეთი Le Figaro.

„თერთმეტი თვე გავიდა მას შემდეგ, რაც დონალდ ტრამპის მეორე ვადით ინაუგურაცია შედგა. თერთმეტი თვე, რომლის განმავლობაშიც მან და მისმა ადმინისტრაციამ ევროკავშირზე შეტევები გაახშირეს. პირველ რიგში, ეს იყო პოლიტიკური თავდასხმები, ფორმულირებული სტილში: „ვაშინგტონი - მეგობარი, რომელსაც თქვენთვის სიკეთე სურს“ და რომელიც ცდილობს ძველი კონტინენტის „მოკავშირეები“ საკუთარი თავისგანვე იხსნას“, - წერია სტატიაში.

„საფრთხე, რომელიც ევროპისთვის ყველაზე შემაშფოთებლად მეჩვენება, არც რუსეთია, არც ჩინეთი და არც რომელიმე სხვა გარე აქტორი. საფრთხე, რომელიც ყველაზე მეტად მაშფოთებს, შიგნიდან მოდის: ევროპა შორდება თავის ზოგიერთ ყველაზე ფუნდამენტურ ღირებულებას“, - განაცხადა ვიცე-პრეზიდენტმა, ჯეი დი ვენსმა თებერვალში გამართულ მიუნხენის უსაფრთხოების კონფერენციაზე სიტყვით გამოსვლისას, რომაც დამსწრე საზოგადოება გააოგნა.

დეკემბრის დასაწყისში, შეერთებული შტატების ახალმა „ეროვნული უსაფრთხოების სტრატეგიამ“ ეს რიტორიკა ოფიციალურად დაადასტურა, სადაც გაჟღერდა გაფრთხილება ევროპის „ცივილიზაციური წაშლის რეალური პერსპექტივის“ შესახებ“.

„ეს განცხადებები 2025 წლის დასაწყისიდან აგრესიული ქმედებებით არის გამყარებული. სავაჭრო ფრონტზე თეთრმა სახლმა ევროკავშირს 15%-იანი საბაჟო ტარიფები დააკისრა. დიპლომატიურ და სამხედრო ასპარეზზე კი დონალდ ტრამპს სურს უკრაინას თავს მოახვიოს ისეთი „მშვიდობა“, რომელიც ვლადიმერ პუტინის მოთხოვნებს უფრო მეტ ანგარიშს უწევს, ვიდრე ნატოში მისი ევროპელი პარტნიორების ინტერესებს“, - წერს სტატიის ავტორი.

„თერთმეტი თვის განმავლობაში თანდათანობით სამი ძირითადი მიმართულება გამოიკვეთა. პირველი, ეს არის ევროპისადმი აბსოლუტური ზიზღი. მარტში, Signal-ის მიმოწერიდან გაჟონილმა ტექსტებმა ამ დამოკიდებულების მასშტაბი ნათლად აჩვენა. „მე სრულად ვიზიარებ თქვენს ზიზღს ევროპული პარაზიტიზმის მიმართ“, - ასე პასუხობდა თავდაცვის მდივანი, პიტ ჰეგსეტი ჯეი დი ვენსს. ამ „ზიზღის“ ლოგიკური შედეგი კი დამცირებაა. ევროპელებს დღემდე მწარედ ახსოვთ ივლისში საბაჟო ტარიფების შესახებ ხელმოწერილი შეთანხმების კადრები, როდესაც აშკარად კმაყოფილმა დონალდ ტრამპმა ურსულა ფონ დერ ლაიენი თავის შოტლანდიურ გოლფ-კლუბში დაიბარა.

მეორე თვალსაჩინო ფაქტი არის მუდმივი სურვილი, რომ მოხდეს არა მხოლოდ ზოგადად ევროპის, არამედ კიდევ უფრო მეტად - ევროკავშირის დისკრედიტაცია. „უფრო ფართო პრობლემებს შორის, რომელთა წინაშეც ევროპა დგას, უნდა აღინიშნოს ევროკავშირისა და სხვა ტრანსნაციონალური ორგანოების საქმიანობა, რომელიც ძირს უთხრის პოლიტიკურ თავისუფლებასა და სუვერენიტეტს“, - ნათქვამია ამერიკის „ეროვნული უსაფრთხოების სტრატეგიაში“. ვაშინგტონი თავის დიპლომატიურ კორპუსს მოუწოდებს, კავშირები გააღრმაონ ევროპულ პატრიოტულ პარტიებთან.

ტრანსატლანტიკურ ურთიერთობებში მესამე ფუნდამენტური ფაქტორი ვაშინგტონის პოლიტიკურ ძალაუფლებასა და ამერიკელ ტექნოლოგიურ მეწარმეებს შორის არსებული ალიანსიდან გამომდინარეობს. როგორც ესეისტი ჯულიანო და ემპოლი La Tribune Dimanche-ში აღნიშნავს, არსებობს „ლიბერალური დემოკრატიიდან გამოსვლისა და ტექნო-ავტორიტარული რეჟიმისკენ სვლის განზრახვა“. „ცენზურის“ წინააღმდეგ ბრძოლა აერთიანებს ორ სამყაროს - MAGA-ს მოძრაობასა და სოციალური მედიის პლატფორმებს. მარკ ცუკერბერგმა, Meta-ს დამფუძნებელმა, ჯერ კიდევ იანვარში ჩამოაყალიბა ეს პროგრამა: „ვიმუშაოთ პრეზიდენტ ტრამპთან ერთად, რათა უკუვაგდოთ მსოფლიოს ის მთავრობები, რომლებიც თავს ესხმიან ამერიკულ კომპანიებს“ და ზეწოლა მოვახდინოთ, კერძოდ, ევროპაზე“, - აღნიშნავს სტატიის ავტორი.

„ტრამპის ადმინისტრაციისა და მისი ტექნოლოგიური მოკავშირეების მტკიცე სურვილი, ძირი გამოუთხარონ ევროკავშირის ლეგიტიმაციას, ირიბად იმაზე მეტყველებს, რომ ეს ევროკავშირი - რომელიც ჩვენთანაც კი ბევრს ასე ძალიან „სძულს“ - იმაზე ძლიერია, ვიდრე ამბობენ“, - წერს გაზეთი Le Figaro.