აშშ-ის ადმინისტრაციამ რამდენიმე რუსულ ბანკს სანქციები შეუჩერა

აშშ-ის ადმინისტრაციამ რამდენიმე რუსულ ბანკს სანქციები შეუჩერა. შესაბამისი განცხადება აშშ-ის ხაზინის დეპარტამენტმა გამოაქვეყნა.

აღინიშნება, რომ სანქციები ნაწილობრივ მოეხსნა იმ დაწესებულებებს, რომლებიც სამოქალაქო ბირთვული ენერგეტიკის პროექტებში მონაწილეობენ.

ხაზინის დეპარტამენტმა გასცა გენერალური ლიცენზია, რომელიც 2026 წლის 18 ივნისამდე რუსეთის გარკვეულ ბანკებთან ოპერაციების განხორციელების საშუალებას იძლევა.

საუბარია იმ ტრანზაქციებზე, რომლებიც დაკავშირებულია 2024 წლის 21 ნოემბრამდე დაწყებულ პროექტებთან.

ხაზინის დეპარტამენტმა დაუშვა ოპერაციების განხორციელება შემდეგ ბანკებთან: გაზპრომბანკი, სბერბანკი, ვითიბი, ალფა-ბანკი და ა.შ.

ლიცენზია ვრცელდება იმ კომპანიებზეც, რომლებშიც ზემოხსენებული ბანკები წილის 50%-ს ან მეტს ფლობენ. ამასთან, ნებართვა ეხება მხოლოდ იმ ოპერაციებს, რომლებიც სამოქალაქო ბირთვული ენერგეტიკის მხარდასაჭერად ხორციელდება.