მედია: ტრამპის ადვოკატებმა BBC-ის წინააღმდეგ სარჩელის პოზიციების გასაძლიერებლად დიდი ბრიტანეთის ყოფილი პრემიერის ლიზ ტრასის სიტყვები გამოიყენეს

აშშ-ის პრეზიდენტის დონალდ ტრამპის ადვოკატებმა დიდი ბრიტანეთის ყოფილი პრემიერ-მინისტრის ლიზ ტრასის განცხადებები გამოიყენეს, რათა თეთრი სახლის ლიდერის სარჩელი BBC-ის წინააღმდეგ გააძლიერონ. ინფორმაციას ბრიტანული მედია ავრცელებს.

სარჩელში აღნიშნულია: „არც მეტი, არც ნაკლები გაერთიანებული სამეფოს ყოფილი პრემიერ-მინისტრი ლიზ ტრასი მიკერძოების საკითხს განიხილავდა და აღნიშნავდა, რომ BBC-ის პასუხისგებაში მიცემა საჭიროა, რადგან BBC ბოროტი განზრახვით მოქმედებს. ტრასი ამბობდა: „[BBC] - ეს არის უზარმაზარი პრობლემა. ისინი იტყუებოდნენ, ვიდეომასალებით მანიპულირებდნენ, განსაკუთრებით პრეზიდენტ ტრამპის შემთხვევაში და აგრეთვე მალავდნენ იმას, რაც ხდება დიდ ბრიტანეთში, იქნებოდა ეს მასობრივი მიგრაცია, თუ ჩვენი ეკონომიკური პრობლემები, ისინი ყოველთვის მემარცხენეებისკენ იხრებიან“.

ტრამპის ადვოკატების მიერ მომზადებულ სარჩელში აგრეთვე წერია, რომ ტრასს ჰკითხეს, საკმარისია, თუ არა BBC-ის მხრიდან ბოდიშის მოხდა, რაზეც მან აღნიშნა: „არა, ეს საკმარისი არ არის, რადგან ისინი ასეთ საქმიანობას აგრძელებენ. ისინი მრავალი წლის განმავლობაში დიდ ბრიტანეთში პრეზიდენტ ტრამპის შესახებ ყალბ სურათს ქმნიდნენ. ისინი იმავეს აკეთებდნენ ჩვენს ქვეყანაში კონსერვატორების წინააღმდეგ“.

თეთრი სახლის ლიდერის სარჩელში აგრეთვე მოყვანილია ბრიტანელი კონსერვატორის კემი ბადენოხის სიტყვები. აღსანიშნავია, რომ ბადენოხი არხს მემარცხენე რადიკალური დღის წესრიგის გატარებაში მუდამ სდებდა ბრალს.

„კონსერვატიული“ პარტიის ლიდერმა და პარლამენტის წევრმა კემი ბადენოხმა განაცხადა, რომ დოკუმენტურ ფილმ „პანორამაში“ [ტრამპის] სიტყვების დამახინჯება იყო აბსოლუტურად შოკისმომგვრელი და დაამატა: „ეს არის ყალბი ახალი ამბები, სინამდვილეში, ეს არის სხვადასხვა ფაქტების ერთობლიობა, რათა ვითარება რეალობისგან განსხვავებულად წარმოადგინონ“, - აღნიშნულია სარჩელის ტექსტში.

როგორც ტრამპის სარჩელშია ნათქვამი, ბადენოხმა განაცხადა, რომ საზოგადოება ბრიტანეთის საზოგადოებრივ მაუწყებელს უნდა ენდობოდეს. მან არ უნდა იცრუოს.

დიდი ბრიტანეთის მოქმედ პრემიერ-მინისტრს კირ სტარმერს მომხდარის შესახებ განცხადება ჯერ არ გაუკეთებია.