Berliner Zeitung: ევროპის საგარეო ქმედებათა სამსახურში კორუფციული სკანდალი ფართოვდება - ყოფილი ოფიციალური პირების დაპატიმრების პარალელურად კაია კალასზე ზეწოლა იზრდება

ბრიუსელში დაძაბულობაა, კორუფციული სკანდალი, რომელიც ევროპის საგარეო ქმედებათა სამსახურში მანიპულირებულ ტენდერებს უკავშირდება, სულ უფრო ფართოვდება - მაშინ, როდესაც ყოფილი მაღალი თანამდებობის პირები, როგორიცაა ფედერიკა მოგერინი, დააკავეს, სხვა პიროვნება ექცევა ყურადღების ცენტრში - კაია კალასი, ევროკავშირის ამჟამინდელი უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, - წერს გერმანული გაზეთი Berliner Zeitung-ი.

გამოცემის ცნობით, გამოძიება კალასის ევროკავშირის მთავარ დიპლომატად დანიშვნამდე პერიოდის შესახებ ტარდება, თუმცა ეს მას ბოლო დღეებში მისი როლის ირგვლივ არსებული კრიტიკული კითხვებისგან არ ათავისუფლებს.

ევროპის საგარეო ქმედებათა სამსახური, რომელსაც კალასი დაახლოებით ერთი წელია ხელმძღვანელობს, ევროკავშირის ერთ-ერთ ყველაზე გაუმჭვირვალე სააგენტოდ ითვლება. ახლა კი, როდესაც ევროკავშირის რამდენიმე ინსტიტუტში ფასადები იმსხვრევა, კრიზისის მართვასთან დაკავშირებით კალასის მიდგომაც სულ უფრო და უფრო დეტალურად განიხილება.

კალასმა სწრაფად მოახდინა რეაგირება. Euractiv-ის ცნობით, შიდა მემორანდუმში მან ისაუბრა „ღრმად შოკისმომგვრელ“ ბრალდებებზე, თუმცა ხაზგასმით აღნიშნა, რომ ისინი „წინა მანდატების ფარგლებში“ წარმოიშვა.

როგორც კალასი წერს, ბრალდებებმა არანაირად არ უნდა იმოქმედოს ევროკავშირის საგარეო სამსახურის „კარგ მუშაობაზე“. თუმცა, როგორც Berliner Zeitung-მა შეიტყო, ევროკავშირის საგარეო სამსახურის ზოგიერთი თანამშრომელი კალასის მემორანდუმს კრიტიკულად უყურებს. ზოგადი განწყობაა, რომ ევროკავშირის უმაღლეს წარმომადგენელს სურს რაც შეიძლება მალე დისტანცირდეს კორუფციის საქმისგან.

კალასის დაპირება „სრული გამჭვირვალობის“ უზრუნველყოფის შესახებ კი კულუარებში უფრო სკეპტიციზმს იწვევს. რამდენიმე თანამშრომელი აღნიშნავს, რომ აქამდე თითქმის არ გამოქვეყნებულა დეტალები შიდა საკონტროლო სტრუქტურებზე - არც იმის შესახებ, როგორ შეიძლებოდა შესაძლო მანიპულაციები განვითარებულიყო. კალასის მითითება ახალი ანტიკორუფციული სტრატეგიის შესახებ ასევე კრიტიკულად ფასდება. კითხვა, თუ რატომ გახდა ასეთი ზომები საჭირო მხოლოდ მისი მანდატის ფარგლებში და იყო თუ არა უწყება მანამდე სტრუქტურულად კორუფციისადმი მოწყვლადი, კვლავაც უპასუხოდ რჩება.

მიუხედავად იმისა, რომ კალასი პოლიტიკური ზიანის შემცირებას ცდილობს, ევროპარლამენტში მემარჯვენე კონსერვატიული ჯგუფები ამჟამინდელ კორუფციულ სკანდალს ბრიუსელის ხელმძღვანელობის მწვავე კრიტიკის გასავრცელებლად იყენებენ.

ბოლო თვეების განმავლობაში, ურსულა ფონ დერ ლაიენსა და კალასს შორის უკვე მიმდინარეობდა ძალაუფლებისთვის ბრძოლა, რომელშიც ევროკომისიის პრეზიდენტმა გაიმარჯვა. კალასის კრიტიკოსები ამტკიცებენ, რომ სკანდალი ფუნდამენტურ კითხვებს ბადებს ევროკავშირის ინსტიტუტებში შიდა კონტროლის მექანიზმებთან და გამჭვირვალობასთან დაკავშირებით. გარდა ამისა, ოპოზიციონერი ევროპარლამენტარები აფრთხილებენ, რომ გამჭვირვალობის ეს ნაკლებობა საფრთხეს უქმნის ევროკავშირის ინსტიტუტების სანდოობას და საზოგადოების მხრიდან ნდობას. და ეს ხდება ისედაც მგრძნობიარე დროს, როდესაც ევროკავშირი ძალიან სუსტ გეოპოლიტიკურ პოზიციაშია.

კალასი, რომელიც წარსულში კანონის უზენაესობისა და გამჭვირვალობის დამცველად ითვლებოდა, გამოძიების გამო, რა თქმა უნდა, გაძლიერებული ყურადღების ქვეშაა. არაერთხელ აღინიშნა, რომ საგარეო საქმეთა სამსახურში სტრუქტურული სისუსტეები, როგორც ჩანს, წლების განმავლობაში შეუმჩნეველი რჩებოდა.