Bild: „გამოგვიყვანეთ აქედან ან მოგვამარაგეთ! თუ არა, ქალაქის დამცველები აქ სამუდამოდ დარჩებიან“ - უკრაინელი ჯარისკაცების სასოწარკვეთილი გზავნილი მირნოგრადიდან

დახმარების დრამატული თხოვნა მირნოგრადიდან, პოკროვსკის მეზობელი ქალაქიდან, რომელიც რუსეთმა ორშაბათს, 14-თვიანი მძიმე ბრძოლების შემდეგ დაიპყრო - აქ 1000-ზე მეტი უკრაინელი ჯარისკაცი კვლავ სასტიკად იცავს ქალაქის ნანგრევებს, - წერს გერმანული გამოცემა Bild-ი.

თუმცა, პოკროვსკის აღებით, მირნოგრადში მყოფი ხუთი უკრაინული ბრიგადის სამხედრო მოსამსახურეების მდგომარეობა კიდევ უფრო გაუარესდა. ქალაქში მყოფმა უკრაინელმა ჯარისკაცმა Bild-ს განუცხადა:

სიმართლე გითხრათ, მდგომარეობა კრიტიკულია. ლოგისტიკა ხორციელდება მხოლოდ დრონებისა და სახმელეთო რობოტული კომპლექსების მეშვეობით. პრობლემატურია საკვების შეტანაც კი.

ჯარისკაცის თქმით, რომელსაც ანონიმურად დარჩენა სურს, უკრაინული სამხედრო ანალიტიკური ჯგუფი DeepState-ის სპეციალისტებმა სიტუაცია რეალისტურად წარმოადგინეს. მათივე ცნობით, რუსეთმა მირნოგრადში მყოფი უკრაინელი ჯარისკაცებისთვის სახმელეთო ლოგისტიკა ფაქტობრივად მთლიანად გადაკეტა.

„ფაქტია: დგება „ქვაბის“ (გარშემორტყმის) საშიშროება, საიდანაც შესაძლოა სულ რამდენიმე დღეში გამოსავალი აღარ იყოს“, - ნათქვამია სტატიაში.

ამ ჯარისკაცმა, რომელიც აცხადებს, რომ მირნოგრადში და მის გარშემო მყოფი 1000-ზე მეტი უკრაინელი სამხედრო მოსამსახურის სახელით საუბრობს, Bild-ს განუცხადა: „რეგიონში ბევრი ქვედანაყოფი გადმოისროლეს. და კარგი იქნებოდა, თუ ერთ-ერთი ასეთი ქვედანაყოფი, სასურველია მთელი ბრიგადა, მომარაგების ამ წყეულ მარშრუტს გააკონტროლებს“.

მისი თქმით, მირნოგრადის დამცველებს რუსების მხოლოდ თვალთვალი შეუძლიათ, რესურსების ნაკლებობის გამო კი მათთან ბრძოლა აღარ ძალუძთ.

მირნოგრადიდან გამოგზავნილი თავისი სასოწარკვეთილი გზავნილის დასასრულს, უკრაინელმა ჯარისკაცმა, რომლის ვინაობაც Bild-მა დაადასტურა, დახმარების თხოვნა გამოაგზავნა იმ პირობით, რომ ის უკრაინის საზოგადოებისთვის გაეცნოთ:

ჩვენი კონტინგენტი ან მირნოგრადიდან უნდა გავიყვანოთ, ან სტაბილური ლოგისტიკა უზრუნველვყოთ. გამოგვიყვანეთ აქედან ან მოგვამარაგეთ! თუ არა, ქალაქის დამცველები აქ სამუდამოდ დარჩებიან.