დონალდ ტრამპმა ჟურნალისტს „გოჭი“ უწოდა

აშშ-ის პრეზიდენტმა ჟურნალისტ ქალს, რომელმაც ჯეფრი ეპშტეინთან დაკავშირებული ფაილების შესახებ კითხვა დაუსვა, „გოჭი“ უწოდა. ეს საპრეზიდენტო თვითმფრინავის ბორტზე მოხდა.

Bloomberg-ის ჟურნალისტმა კეტრინ ლიუსიმ მას ჰკითხა, რატომ ეწინააღმდეგება პრეზიდენტი ფაილების გამოქვეყნებას, თუ დასამალი არაფერი აქვს.

„გაჩუმდი, გაჩუმდი, გოჭო“, - უთხრა ტრამპმა ლიუსის პარასკევს და მისი მიმართულებით თითი გაიშვირა, თუმცა ამის ამსახველი კადრები მხოლოდ მიმდინარე კვირას გავრცელდა.

გუშინ კი, როდესაც ტრამპი თეთრ სახლში საუდის არაბეთის პრინცს მასპინძლობდა, ის ABC News-ის ჟურნალისტ მერი ბრიუსს ლიცენზიის გაუქმებით დაემუქრა, მას შემდეგ, რაც ქალმა პრინც მოჰამედს ჟურნალისტ ჯამალ ხაშოგისთან დაკავშირებული კითხვა დასვა.

„აშშ-ის დაზვერვამ დაადგინა, რომ ჟურნალისტის ბრუტალური მკვლელობა თქვენ მიერ იყო ორგანიზებული. 11 სექტემბერს დაღუპულთა ახლობლები განრისხებულები არიან, რომ თქვენ ოვალურ ოფისში იმყოფებით. რატომ უნდა გენდოთ ამერიკელები?“, - ჰკითხა მან პრინცს, რის შემდეგაც გაბრაზებულმა ტრამპმა უპასუხა: „ABC ყალბი ამბები. ერთ-ერთი ყველაზე უარესი ამ სფეროში. თქვენი კითხვა კი არა, თქვენი ქცევა მაღიზიანებს. ვფიქრობ, საშინელი რეპორტიორი ხართ“.