CNN: ობამამ და პელოსიმ კერძო საუბრებში შეშფოთება გამოთქვეს ჯო ბაიდენის საარჩევნო კამპანიის მომავალთან დაკავშირებით

აშშ-ის ყოფილმა პრეზიდენტმა, ბარაკ ობამამ და წარმომადგენელთა პალატის ყოფილმა სპიკერმა, ნენსი პელოსიმ კერძო საუბრებში შეშფოთება გამოთქვეს ჯო ბაიდენის საარჩევნო კამპანიის მომავალთან დაკავშირებით. ინფორმაციას ამის შესახებ ტელეკომპანია CNN-ი ავრცელებს.

როგორც ტელეკომპანია CNN-ი იუწყება, ყოფილმა ოფიციალურმა პირებმა შეშფოთება გამოხატეს იმის თაობაზე, თუ რამდენად რთული გახდა პრეზიდენტისთვის დონალდ ტრამპის დამარცხება.

CNN-ი ესაუბრა კონგრესის წევრებსა და იმ ადამიანებს, რომლებიც კავშირში არიან როგორც ობამასთან, ასევე პელოსისთან. წყაროების განცხადებით, ბაიდენის კანდიდატურის მოხსნა აშკარაა და ამ ეტაპზე მხოლოდ ის არის გასარკვევი, თუ როგორ განვითარდება ეს სცენარი.

მანამდე ნენსი პელოსიმ განაცხადა, რომ პრეზიდენტმა ბაიდენმა უნდა გადახედოს საპრეზიდენტო რბოლაში დარჩენის შესახებ გადაწყვეტილებას.

ნენსი პელოსის თქმით, პრეზიდენტმა უნდა გააგრძელოს თავისი ვარიანტების აწონვა.

„პრეზიდენტის გადასაწყვეტია აპირებს თუ არა კანდიდატურის დაყენებას. ჩვენ ყველანი მოვუწოდებთ მას ამ გადაწყვეტილების მიღებისკენ, ვინაიდან დრო იწურება“, - აღნიშნა ნენსი პელოსიმ.

„მე მინდა მან ის გააკეთოს, რასაც გადაწყვეტს. და ეს ასეა. რა გადაწყვეტილებასაც მიიღებს, ჩვენ მასთან ვართ“, - დასძინა მან.