მედია: კარლეს პუჩდემონი ბრიუსელში იმყოფება

კატალონიის მთავრობის ყოფილმა მეთაურმა კარლეს პუჩდემონმა და რეგიონული ხელისუფლების კიდევ რამდენიმე ყოფილმა წევრმა შესაძლოა ბელგიაში პოლიტიკური თავშესაფარი ითხოვონ. ამის შესახებ ინფორმაციას La Sexta Tv-ი ავრცელებს.

მედიის ცნობით, ექს ლიდერი უკვე ბრიუსელში იმყოფება. სხვა დეტალები ამ დროისთვის უცნობია.

დღესვე ცნობილი გახდა, რომ ესპანეთის გენერალურმა პროკურორმა კატალონიის ყოფილი მეთაურის კარლეს პუჩდემონის და კიდევ 20-მდე ჩინოსნის წინააღმდეგ სასამართლოს მიმართა.

27 ოქტომბერს კატალონიის პარლამენტმა ესპანეთისგან გამოყოფის შესახებ ოფიციალურად განაცხადა. დეკლარაციას ხმა 72-მა დეპუტატმა მისცა. წინააღმდეგი იყო 10. ორმა თავი შეიკავა. დანარჩენმა დეპუტატებმა კენჭისყრას ბოიკოტი გამოუცხადეს (სულ 135 დეპუტატი).

გამოცხადების შემდეგ ერთ საათში, ესპანეთის სენატმა გადაწყვიტა, რომ კონსტიტუციის 155-ე მუხლი აამოქმედოს, რაც ბარსელონის ხელისუფლების მადრიდზე დაქვემდებარებას გულისხმობს, შესაბამისად რეგიონის ავტონომიის გაუქმებას. ვადამდელი საპარლამენტო არჩევნები 21 დეკემბერს გაიმართება რის შემდეგაც დეპუტატები ახალ რეგიონულ მთავრობას დანიშნავენ.