ქარიშხალი "მარია" მეხუთე კატეგორიამდე გაძლიერდა

ქარიშხალი „მარია" მეხუთე კატეგორიამდე გაძლიერდა და კარიბის ზღვის კუნძულ დომინიკას დაატყდა თავს. ამის შესახებ BBC წერს. ქარის სიჩქარე საათში 260 კილომეტრს აღწევს. „მარია“ ისეთივე მიმართულებით მოძრაობს, როგორც ქარიშხალი „ირმა“.

დომინიკის პრემიერმინისტრმა Facebook-ზე დაწერა, რომ მის სახლს ქარმა სახურავი ახადა და ის ქარიშხლის ტყვეობაში აღმოჩნდა. კუნძულზე ყველა პორტი და აეროპორტი დაიხურა.

ქარიშხალი „მარია” პუერტო-რიკოსკენ მიემართება. პუერტო-რიკოს გუბერნატორმა საგანგებო მდგომარეობა გამოაცხადა. როგორც ვარაუდობენ, სტიქია კუნძულს 20 სექტემბერს დაატყდება თავს.

„მარიას“ კი ტროპიკული შტორმი „ლი“ მოსდევს, რომელიც ასევე კარიბის აუზის კუნძულებს ემუქრება. ატლანტის ოკეანეში ამჟამად კიდევ ერთი ქარიშხალი „ხოსე" მძვინვარებს.

მანამდე რეგიონს ქარიშხალმა „ირმამ“ უდიდესი ზიანი მიაყენა. ქარიშხლის გამო, 8 სექტემბერს ფლორიდის შტატიდან 6,5 მილიონზე მეტი ადამიანის ევაკუაცია განხორციელდა. ბოლო მონაცემებით, სტიქიას 55 ადამიანის სიცოცხლე ემსხვერპლა.

თავდაპირველად, „ირმა“ მეხუთე კატეგორიის საშიშროებამდე გაძლიერდა, რითაც ქარიშხალ „ჰარვიზე" დამანგრეველი აღმოჩნდა, რომელიც აშშ-ის 26 აგვისტოს დაატყდა თავს და 80-ზე მეტი ადამიანის სიცოცხლე იმსხვერპლა.