ანგელა მერკელი ალექსეი ნავალნის მოწამვლაზე: უნდა გაირკვეს, როგორ მოხდა ეს - ჩვენ ამას დაჟინებით მოვითხოვთ
მსოფლიო

ანგელა მერკელი
ფოტო: Reuters
გერმანიის კანცლერის, ანგელა მერკელის განცხადებით, ალექსეი ნავალნის ირგვლივ შექმნილი სიტუაცია გამჭვირვალეობას ითხოვს.
„უნდა გაირკვეს, თუ როგორ მოხდა ეს. ჩვენ ამას დაჟინებით მოვითხოვთ“, - განაცხადა ანგელა მერკელმა.
გერმანიის კანცლერმა იმედი გამოთქვა, რომ ალექსეი ნავალნი სწრაფად გამოჯანმრთელდება.
„თუ მოგვმართავენ, სამედიცინო დახმარებას გავუწევთ, მათ შორის გერმანიის საავადმყოფოებში“, - დასძინა მან.
20 აგვისტოს ქალაქ ტომსკიდან მოსკოვში თვითმფრინავით მგზავრობისას, ალექსეი ნავალნი ცუდად გახდა, რის გამოც თვითმფრინავი ავარიულად, ომსკში დაეშვა, სადაც ნავალნი მოწამვლის სიმპტომებით რეანიმაციაში მოათავსეს. პოლიტიკოსის მდგომარეობა მძიმეა, ის ხელოვნურ კომაში იმყოფება და ფილტვების ხელოვნური ვენტილაციის აპარატზეა შეერთებული.





