ირანი აშშ-ის სპარსეთის ყურეში მომხდარ ინციდენტთან დაკავშირებით დეზინფორმაციის გავრცელებაში ადანაშაულებს

„ირანის ისლამური რევოლუციის გუშაგთა კორპუსი“ აშშ-ის ფლოტს სპარსეთის ყურეში მომხდარი ინციდენტის „ჰოლივუდური ვერსიის“ გავრცელებაში ადანაშაულებს. ამის შესახებ BBC წერს.

გამოცემის ინფორმაციით, ვაშინგტონში განაცხადეს, რომ 11 ირანული ხომალდი 6 ამერიკულ გემს მიუახლოვდა, დიდი სიჩქარით მოძრაობდნენ და „სახიფათო და პროვოკაციულ ქმედებებს ახორციელებდნენ“. ამერიკული გემები ყურეში სამხედრო წვრთნებს ატარებდნენ.

გუშაგთა კორპუსში კი ამტკიცებენ, რომ ირანული გემების რაოდენობა ყურეში მას შემდეგ გაიზარდა, რაც ამერიკულმა გემებმა თვის დასაწყისში ირანულ გემს გზა გადაუკეტეს. კორპუსის განცხადებაში ნათქვამია, რომ ამერიკელებმა ერთ-ერთ ირანულ გზას ორჯერ გადაუკეთეს გზა, სახიფათოდ მოქმედებდნენ და გაფრთხილებებს არ ითვალისწინებდნენ.

ირანსა და აშშ-ს შორის ურთიერთობების გამწვავება ბაღდადში ამერიკელი სამხედროების მიერ გენერალ ყასემ სულეიმანის მკვლელობას მოჰყვა. ამის შემდეგ ირანმა ერაყში ამერიკულ ბაზებზე სარაკეტო იერიში 8 იანვარს გამთენიისას მიიტანა. ამავე დღეს თეირანში უკრაინული ავიახაზების თვითმფრინავი ჩამოვარდა, რასაც 176 მგზავრი ემსხვერპლა. ირანის „ისლამური რევოლუციის გუშაგთა კორპუსმა“ განაცხადა, რომ თვითმფრინავი შეცდომით ჩამოაგდო.