ვინ არის აბუ ბაქრ ალ-ბაღდადი, რომელიც სავარაუდოდ სირიაში მოკლეს

აბუ ბაქრ ალ-ბაღდადის (ნამდვილი სახელი - იბრაჰიმ ავად ალ-ბადრი) კარგი ტაქტიკოსის ​და დაუნდობელი მეთაურის რეპუტაცია აქვს. ის ერაყის დედაქალაქ ბაღდადის მახლობლად, ქალაქ სამარაში 1971 წელს დაიბადა. არსებული ინფორმაციით, 2003 წელს, ამერიკული ჯარების ერაყში შეჭრის დროს ალ-ბაღდადი ერთ-ერთ მეჩეთში მსახურობდა.

მის წარსულთან დაკავშირებით სხვადასხვა ინფორმაცია ვრცელდება. არსებობს ვარაუდი, რომ სადამ ჰუსეინის მმართველობის პერიოდში ის უკვე შეიარაღებული ჯიჰადისტი იყო, თუმცა სხვა წყაროები ამტკიცებენ, რომ ალ-ბაღდადის რადიკალიზაცია სამხრეთ ერაყში ბუქას ციხეში მოხდა, სადაც ამერიკელ სამხედროებს „ალ-ქაედას“ რამდენიმე მეთაური ჰყავდა დატყვევებული. ალ-ბაღდადიმ ბუქას ბანაკში ოთხი წელი გაატარა.

2010 წელს ის ერაყში „ალ-ქაედას“ ლიდერი გახდა, მოგვიანებით კი ეს დაჯგუფება „ისლამურ სახელმწიფოს“ შეუერთდა. 2014 წელს „ისლამურმა სახელმწიფომ“ ერაყის ჩრდილოეთის დიდ ნაწილზე კონტროლი დაამყარა და ქვეყნის სიდიდით მეორე ქალაქი - მოსული დაიპყრო. 29 ივნისს დაჯგუფებამ სირიასა და ერაყში დაკავებულ ტერიტორიებზე სახალიფო გამოაცხადა, ალ-ბაღდადი კი ხალიფა გახდა.

2011 წლის ოქტომბერში აშშ-მა აბუ ბაქრ ალ-ბაღდადი ტერორისტების სიაში ოფიციალურად შეიყვანა და მისი დაკავების ან ლიკვიდაციისთვის სასარგებლო ინფორმაციის სანაცვლოდ 10 მილიონი დოლარის ოდენობის ჯილდო დააწესა.

2014 წლის 5 ივლისს ალ-ბაღდადი მოსულის მეჩეთში პარასკევის ლოცვის დროს პირველად გამოვიდა სიტყვით და მთელი მსოფლიოს მუსლიმებს ჯიჰადში ჩართვისკენ მოუწოდა.

2015 წლის მარტში ალ-ბაღდადი ერაყისა და სირიის საზღვარზე ავტომობილით გადაადგილებისას დასავლური კოალიციის იერიშის შედეგად დაიჭრა. მედიაში ვრცელდებოდა ინფორმაცია, რომ ის სირიის ქალაქ ერ-რაქას ერთ-ერთ სააავადმყოფოში გარდაიცვალა. მოგვიანებით The Guardian-მა დაწერა, რომ ალ-ბაღდადი გადარჩა, თუმცა კიდურებს ვეღარ ამოძრავებდა.

ალ-ბაღდადის ლიკვიდაციის შესახებ ცნობები 2016 წლის ივნისშიც გავრცელდა, იმავე წლის ოქტომბერში კი მედია წერდა, რომ ალ-ბაღდადი და ტერორისტული დაჯგუფების კიდევ 3 მაღალჩინოსანი მოწამლეს.

2017 წლის ივნისში სირიული მედია იტყობინებოდა, რომ ალ-ბაღდადი ქალაქ რაქაზე რუსეთის ავიაიერიშს ემსხვერპლა, თუმცა დასავლური კოალიციის წარმომადგენელმა, აშშ-ის არმიის პოლკოვნიკმა რაიან დილონმა ალ-ბაღდადის გარდაცვალება ვერ დაადასტურა.

2017 წლის სექტემბერში „ისლამურმა სახელმწიფომ“ ალ-ბაღდადის გარდაცვალების შესახებ ინფორმაცია უარყო და მისი 46-წუთიანი აუდიომიმართვა გაავრცელა, რომელშიც ალ-ბაღდადი რამდენიმე კვირის წინ მომხდარ მოვლენებზე საუბრობდა.

2018 წლის თებერვალში მედია წერდა, რომ აბუ ბაქრ ალ-ბაღდადი მძიმე მდგომარეობაში, სირიაში ტერორისტების ერთ-ერთ საველე ჰოსპიტალში იმყოფება და მას სიცოცხლესთან შეუთავსებელი ჭრილობები აქვს. რამდენიმე თვეში ალ-ბაღდადიმ 1-საათიანი აუდიომიმართვა გაავრცელა და ჯიჰადისტებს არაბეთის ნახევარკუნძულზე, აზიისა და აფრიკის ქვეყნებში ტერაქტების მოწყობისკენ მოუწოდა და კანადის ქალაქ ტორონტოში მომხდარ სროლაზე აიღო პასუხისმგებლობა. იმავე წლის დეკემბერში პენტაგონმა განაცხადა, რომ ალ-ბაღდადი მდინარე ევფრატთან, ერთ-ერთ უდაბნოს აფარებს თავს.

29 აპრილს ტერორისტული დაჯგუფების მედიასაშუალებებმა ბოლო 5 წლის განმავლობაში ალ-ბაღდადის პირველი ვიდეო გაავრცელეს, რომელშიც „ისლამური სახელმწიფოს“ ლიდერი რამდენიმე ადამიანთან ერთად მსჯელობს „ჯვაროსნების“ წინააღმდეგ ომისა და სირიის ქალაქ ბაღუზში საბრძოლო მოქმედებების შესახებ, რომლის გათავისუფლების თაობაზე აშშ-მა 2019 წლის მარტში გამოაცხადა. მიმდინარე წლის სექტემბერში ალ-ბაღდადიმ კიდევ ერთი აუდიომიმართვა გაავრცელა და ორგანიზაციის ერთგულ მებრძოლებს ლოცვისკენ, მედიასაქმიანობის გაძლიერებისკენ, უფრო აქტიური სამხედრო ქმედებებისკენ და უსაფრთხოების დონის გაზრდისკენ მოუწოდა.