უკრაინის სასამართლომ მალაიზიური ბოინგის საქმის მთავარი მოწმე პატმრობიდან გაათავისუფლა

კიევის სააპელაციო სასამართლომ პატიმრობიდან გაათავისუფლა დონეცკის თვითგამოცხადებული რესპუბლიკის საჰაერო თავდაცვის ბრიგადების ყოფილი ხელმძღვანელი ვლადიმირ ცემახი, რომელიც უკრაინაში მალაიზიური ბოინგის ჩამოგდების საქმის ერთ-ერთი მთავარი თვითმხილველია. ამის შესახებ ინფორმაციას Deutsche Welle-ს რუსული გამოცემა ავრცელებს.

სააპელაციო განხილვის დროს პროკურორი ამტკიცებდა, რომ ვლადიმირ ცემახის პატიმრობიდან გათავისუფლებით მის სიცოცხლეს საფრთხე შეექმნება. პროკურორის მოსაზრებით, კრემლი საქმის მთავარი ფიგურანტის "მოშორებას" მოინდომებს.

უკრაინული მედიის ცნობით, 40-მა ევროდეპუტატმა უკრაინის პრეზიდენტს ვოლოდიმირ ზელენსკის მოუწოდა, რომ არ გაცვალოს მალაიზიური ბოინგის საქმის მთავარი მოწმე რუსეთთან. მანამდე გავრცელდა ინფორმაცია იმის შესახებ, რომ უკრაინამ და რუსეთმა პატიმრები გაცვალეს. ამის შესახებ Facebook-ზე უკრაინის რადის ერთ-ერთმა თანამშრომელმა ანა ისლამოვამ დაწერა. „გაცვლა დასრულებულია: მეზღვაურები, სენცოვი, კარპიუკი, ბალუხი, გრიბი სახლში მოფრინავენ“, - წერია შეტყობინებაში.

2019 წლის ივლისში მალაიზიური ბოინგის საქმეზე ბრალი წარედგინათ რუსეთის თავდაცვის სამინისტროს მთავარი სადაზვერვო სამმართველოს გენერალ-მაიორს სერგეი დუბინსკის, სეპარატისტების ერთ-ერთ ლიდერს იგორ გირკინს, პოლკოვნიკ ოლეგ პულატოვს და უკრაინის მოქალაქეს ლეონიდ ხარჩენკოს.

საერთაშორისო საგამოძიებო გუნდმა, 24 მაისს "მალაიზიის ავიახაზების" ანგარიში წარადგინა. გამომძიებლებმა დაადგინეს, რომ "ბუკი", რომლიდანაც MH17 ჩამოაგდეს, კურსკთან არსებულ 53-ე საზენიტო ბრიგადიდან წაიღეს. რუსეთი მალაიზიური "ბოინგის" ჩამოგდებას კატეგორიულად უარყოფს.

ამერიკის შეერთებული შტატები სრულებით ენდობა საერთაშორისო საგამოძიებო ჯგუფს, რომლის დასკვნითაც, მალაიზიური „ბოინგი“ რუსული „ბუკით“ ჩამოაგდეს.

2014 წელს თვითმფრინავი, რომელიც ამსტერდამი-კუალა-ლუმპურის მიმართულებით ასრულებდა რეისსს, 2014 წლის 17 ივლისს დონეცკის ოლქის აღმოსავლეთ ნაწილში ჩამოვარდა. დაიღუპა 283 მგზავრი და ეკიპაჟის 15 წევრი.