დიდ ბრიტანეთში კორონავირუსით სიკვდილიანობის სტატისტიკის შედგენის მეთოდიკის შეცვლის შემდეგ გარდაცვლილთა საერთო რაოდენობა 21 678-დან 26 ათასამდე გაიზარდა

დიდ ბრიტანეთში კორონავირუსით გარდაცვლილთა საერთო რაოდენობა მკვეთრად გაიზარდა მას შემდეგ, რაც მთავრობამ სიკვდილიანობის სტატისტიკაში მოხუცებულთა სახლებში, ჰოსპისებსა და საკუთარ სახლებში გარდაცვლილთა მონაცემები შეიყვანა. ამის შესახებ დიდი ბრიტანეთის საგარეო საქმეთა მდივანმა, დომინიკ რააბმა განაცხადა.

აღსანიშნავია, რომ ახალი მეთოდიკით შედგენილი სტატისტიკის თანახმად, დიდი ბრიტანეთი კორონავირუსით სიკვდილიანობის მაჩვენებლით მსოფლიოში მესამე ადგილზე გავიდა.

„სტატისტიკაში საერთო ჯამში კორონავირუსით გარდაცვალების 3 811 შემთხვევა შევიყვანეთ. ამიერიდან სტატისტიკაში არა მხოლოდ საავადმყოფოებში გარდაცვლილებს შევიყვანთ, არამედ მათთაც, ვინც კორონავირუსით მოხუცებულთა სახლებში, ჰოსპისებსა და საკუთარ სახლებში გარდაიცვალნენ. ბოლო 24 საათის განმავლობაში ქვეყანაში კორონავირუსით 765 ადამიანი გარდაიცვალა“, - განაცხადა დომინიკ რააბმა.

სტატისტიკის შედგენის მეთოდიკის შეცვლის შემდეგ დიდ ბრიტანეთში კორონავირუსით გარდაცვლილთა საერთო რაოდენობა 21 678-დან 26 ათასამდე გაიზარდა.