ეპისკოპოსი ჯუზეპე პაზოტო: თუ მთავრობის გადაწყვეტილება არ მიდის რწმენის წინააღმდეგ, მე ვალდებული ვარ, დავემორჩილო

საქართველოში კათოლიკური ეკლესიის ხელმძღვანელის, ეპისკოპოს ჯუზეპე პაზოტოს განცხადებით, ეპისკოპოსისთვის არაა ადვილი იმის თქმა, რომ ხალხი ეკლესიაში არ მოვიდეს, იმიტომ, რომ ეკლესია ყოველთვის საპირისპიროს ამბობს და მრევლს ერთად ყოფნისკენ მოუწოდებს, თუმცა, მეორე მხრივ, ადამიანი ღმერთისთვის ყველაზე ძვირფასია. ამის შესახებ მან „ტვ პირველის“ ეთერში განაცხადა.

„კვირა დღე ჩვენთვის დიდი დღესასწაული იყო, ყველაზე მთავარი - აღდგომის დღესასწაული. ამ დღემ ძალიან უცნაურად ჩაიარა, იმიტომ რომ ყველა ეკლესია ცარიელი იყო. ხალხმა გაიგო, რომ არ შეიძლებოდა ეკლესიაში მისვლა, ვინაიდან მე სამი დეკრეტით შევატყობინე მრევლს ამის შესახებ. წირვა ყოველ კვირას ტარდებოდა, მაგრამ ხალხის გარეშე. ერთი მხრივ, ეს არ იყო იოლი გადაწყვეტილება და მე ვილოცე, ვიფიქრე, ვესაუბრე სხვებს ამის შესახებ. ეპისკოპოსისთვის არაა ადვილი იმის თქმა, რომ ხალხი ეკლესიაში არ მოვიდეს, იმიტომ, რომ ჩვენ ყოველთვის საპირისპიროს ვამბობთ, რომ მრევლი ეკლესიაში დადიოდეს და ჩვენ ყველა ერთად ვიყოთ. თუმცა, მეორე მხრივ, ადამიანი ღმერთისთვის ყველაზე ძვირფასია. ღმერთი ადამიანში უნდა ვიპოვოთ, ადამიანებისთვის მსახურება ღმერთისთვის მსახურებაა. ლიტურგია გვაძლევს ძალას, ვემსახუროთ ადამიანს. ასე იქცეოდა იესო თავისი ცხოვრების განმავლობაში. მთავრობა ვალდებულია, ქვეყანაზე იზრუნოს და თუ მათი გადაწყვეტილება არ მიდის რწმენის წინააღმდეგ, მე ვალდებული ვარ, დავემორჩილო. ამ დღეებში ჩვენ უნდა დავანახოთ ყველას, რომ კაცობრიობა ერთი ოჯახია. ესაა ბიბლიური და თეოლოგიური ხედვა. ღარიბები და მდიდრები, კათოლიკეები, მართლმადიდებლები, პროტესტანტები, მუსლიმები - ყველანი ღვთის შვილები ვართ, ამიტომ ერთმანეთი სხვებისგან უნდა დავიცვათ“, - განაცხადა პაზოტომ.

საქართველოში კორონავირუსი 296 ადამიანს დაუდასტურდა, მათგან 69 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. რა უნდა ვიცოდეთ საგანგებო მდგომარეობის შესახებ, წაიკითხეთ აქ.