მარნეულში, სოფელ მარადისის კლასტერიდან სამ ადამიანს კორონავირუსი დაუდასტურდა

მარნეულში კორონავირუსის სამი შემთხვევა სოფელ მარადისის კლასტერიდან არის. მუნიციპალიტეტის მერმა, ზაურ დარგალმა განაცხადა, რომ დღევანდელი დადასტურებული შემთხვევა ორი დღის წინ გამოვლენილი, ინფიცირებული ქალის ოჯახის წევრებს უკავშირდება.

ოჯახში ვირუსი სულ ექვს პირს დაუდასტურდა. მისივე ცნობით, სოფელ მარადისში სულ 40 ოჯახი ცხოვრობს და ყველა თვითიზოლაციაშია.ამასთან, სოფელში ყოველდღე ტარდება თერმოსკრინინგი.მარნეულის მუნიციპალიტეტში უკვე 21 დღეა მკაცრი საკარანტინო რეჟიმი მოქმედებს. აქ სულ 14 ადამიანს დაუდასტურდა კორონავირუსი, შვიდი უკვე გამოჯანმრთელდა.

საქართველოში კორონავირუსი 252 ადამიანს დაუდასტურდა, მათგან 63 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. რა უნდა ვიცოდეთ საგანგებო მდგომარეობის შესახებ, წაიკითხეთ აქ.