დავით ზალკალიანი მოქალაქეების სამშობლოში დაბრუნებაზე: მეამაყება, რომ საქართველოს ხელისუფლებამ ამ მხრივ მნიშვნელოვანი ნაბიჯები გადადგა

საქართველომ მაშინ დაიწყო საკუთარ მოქალაქეებზე ზრუნვა, როდესაც სხვა ქვეყნები ამ პროცესით ჯერ კიდევ არ იყვნენ დაკავებული, – ამის შესახებ საქართველოს საგარეო საქმეთა მინისტრმა, დავით ზალკალიანმა საზოგადოებრი მაუწყებლის ეთერში განაცხადა.

მისი თქმით, საქართველოს ხელისუფლებამ მოქალაქეების დაბრუნების მხრივ მნიშვნელოვანი ნაბიჯები გადადგა, თუმცა საზღვრებს გარეთ ჯერ კიდევ იმყოფება ჩვენი ათეულ ათასობით მოქალაქე და ხელისულება პროცესს ეტაპობრივად მიუყვება.

„ეს ჩვენზე ბევრად ძლიერმა სისტემურმა ქვეყნებმა ვერ მოახერხეს და მეამაყება, რომ საქართველოს ხელისუფლებამ ამ მხრივ მნიშვნელოვანი ნაბიჯები გადადგა. საგარეო საქმეთა სამინისტრო, საკოორდინაციო საბჭოსთან მჭიდრო კოორდინაციით და პრემიერ-მინისტრის დავალებით უკვე თვეზე მეტია, აქტიურად მუშაობს საქართველოს მოქალაქეების დაბრუნების პროცესზე. ამ მიმართულებით მნიშვნელოვნად ხელშესახები შედეგი გვაქვს. უკვე მოვახერხეთ 4 000-ზე მეტი მოქალაქის დაბრუნება, რაც შექმნილ არაორდინალურ სიტუაციაში, როდესაც მთელი რიგი ქვეყნების საჰაერო სივრცე დახურულია და დიდი ავიაკომპანიები არ დაფრინავენ, დამერწმუნებით, ადვილი არ არის. ჩვენ გვიწევს ამ ურთულეს სიტუაციაში გადაწყვეტილებების ძალიან სრაფად მიღება და ჩვენი თანამოქალაქეების სამშობლოში დაბრუნება“, – განაცხადა ზალკალიანმა.

დავით ზალკალიანის თქმით, ხელისუფლება მგზავრთა რაოდენობაში შეზღუდულია და ცალკეულ რეისებზე 100-დან 120 ადამიანამდე განთავსება ხდება, რადგან მსოფლიო ჯანდაცვის ორგანიზაციის მხრიდან განსაზღვრულია, რომ მგზავრების ჭადრაკისებური განთავსება მოხდეს და მგზავრები მჭიდროდ არ განთავსდნენ, რათა მათ შორის ინფექციის გადადება არ მოხდეს.

„ჩვენმა მოქალაქეებმა შექმნილი გარემოება უნდა გაითავისონ და გაითვალისწინონ. რა თქმა უნდა, მესმის მათი წუხილი, რომ ყველა მათგანი ვერ ხვდება რეისებში და ვერ ახერხებს ბილეთების სწრაფად შეძენას, მაგრამ ჩვენ რეგისტრირებული გვყავს განსაკუთრებული საჭიროების მოქალაქეები. იქ არიან მცირეწლოვანი ბავშვები და ჯანმრთელობის პრობლემების მქონე ადამიანები, რაც კორონავირუსთან არ არის დაკავშირებული. ამას აუცილებლად ვითვალისწინებთ და უპირატესობა, რა თქმა უნდა, ასეთი კატეგორიის მოქალაქეებს აქვთ. ასევე, იმ მოქალაქეებს, რომლებიც თავშესაფრის და ფაქტიურად, ლუკმა-პურის გარეშე არიან დარჩენილი“, – განაცხადა დავით ზალკალიანმა.

საქართველოში ამ დროისთვის კორონავირუსის 134 შემთხვევა დადასტურდა, მათგან 26 ადამიანი უკვე განიკურნა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. რა უნდა ვიცოდეთ საგანგებო მდგომარეობის შესახებ, წაიკითხეთ აქ.