სათამაშო ბიზნესის მოსაკრებლიდან ბიუჯეტში შემოსავალი გაიზარდა

სათამაშო ბიზნესის მოსაკრებლის სახით, 2018 წლის სახელმწიფო ბიუჯეტში 136 მილიონ 507 ათას 502 ლარი შევიდა. ბიუჯეტის შესრულების ანგარიშის მიხედვით, ამ მაჩვენებელში სათამაშო აპარატებიდან, ტოტალიზატორის, ბინგოს, ლოტოს სალაროებიდან, სისტემურ-ელექტრონული ფორმის თამაშობიდან, კლუბის მაგიდიდან და ასევე, სამორინეს მაგიდიდან მიღებული შემოსავლები ერთიანდება, - წერს bm.ge, 2018 წლის სახელმწიფო ბიუჯეტის შესრულების ანგარიშზე დაყრდნობით.

სახელმწიფო ბიუჯეტს, შესრულების ანგარიშის მიხედვით, ყველაზე დიდი შემოსავალი სათამაშო აპარატების მოსაკრებელმა მოუტანა - 75 მილიონ 32 ათას 91 ლარი.

შემოსავლების კუთხით მეორე ადგილზე სამორინეს მაგიდიდან მოსაკრებელია - 41 მილიონ 312 ათას 326 ლარით.

ცნობისთვის, სათამაშო ბიზნესის მოსაკრებლიდან შემოსავლები ბოლო 3 წლის განმავლობაში, მნიშვნელოვნად არის გაზრდილი. მაგალითად, 2016 წელს ეს მაჩვენებელი 73 მილიონ 341 ათას 290 ლარი იყო, 2017 წელს კი - 119 მილიონ 585 ათას 409 ლარი.