პირველი ნოემბრიდან თანამსესხებელთან ერთად სესხის აღების წესი იცვლება

„ფიზიკურ პირებზე სესხების გაცემის შესახებ“ ეროვნული ბანკის მიერ შემუშავებული ახალი რეგულაციების ნაწილი პირველი ნოემბრიდან ამოქმედდება.

კერძოდ, ნოემბრიდან კომერციულ ბანკებში მსესხებელი სესხს ვერ აიღებს, თუ თანამსესხებელი მისივე ოჯახის წევრი არ იქნება.

დებულების თანახმად, რეგულაცია კომერციული ბანკებისთვის პირველი ნოემბრიდან, ხოლო სესხის გამცემი სხვა სუბიექტებისთვის 2019 წლის იანვრიდან ამოქმედდება.

გარდა ამისა, თუ მსესხებლის/თანამსესხებლის გადამხდელუნარიანობის ანალიზი ჩატარებული არ არის, პირი უძრავი ქონებით უზრუნველყოფილი სესხის მიღებას ვერ შეძლებს, თუ მსესხებელს/თანამსესხებელს ერთზე მეტი საცხოვრებელი უძრავი ქონება არ ექნება.

მიმდინარე წლის პირველი ნოემბრიდან ეროვნული ბანკის პრეზიდენტის ბრძანება ამოქმედდება, რომელიც ქვეყანაში სესხის გამცემ ორგანიზაციებს დამატებით შეზღუდვებს დაუწესებს. ასევე დგინდება, რა ხანგრძლივობის შეიძლება იყოს ამა თუ იმ ტიპის სესხი.