Google-ში კრიპტოვალუტის რეკლამის აკრძალვის დაანონსების შემდეგ ბიტკოინი გაუფასურდა

ბიტკოინის ღირებულება 1 დღე-ღამის განმავლობაში 7%-ით გაუფასურდა. ამის მიზეზი ის გახდა, რომ Google-მა კრიპტოვალუტის რეკლამის აკრძალვა დააანონსა. ამის შესახებ Cointelegraph-ი წერს.

17 მარტს ბიტკოინის ღირებულება 8000 დოლარი იყო, დღეს კი მისი ფასი 7500 დოლარამდე შემცირდა. ამ დროისთვის კი მსოფლიოში ყველაზე პოპულარული კრიპტოვალურის ღირებულება 7 723 დოლარია.

14 მარტს ცნობილი გახდა, რომ Google-ი 2018 წლის ივნისიდან ქსელში კრიპტოვალუტის რეკლამებს დაბლოკავს. ამის მიზეზი ინტერნეტში დაურეგულირებელი ფინანსური პროდუქტების შემცირებაა.

მანამდე კრიპტოვალუტისა და ICO-ს რეკლამირება Facebook-მა აკრძალა,აკრძალვა Instagram-ზეც ვრცელდება.

2017 წლის დეკემბერში, პიკზე, ბიტკოინის კურსი 20 ათას დოლარს აღწევდა. ამის შემდეგ კრიპტოვალუტამ გაიაფება დაიწყო.

მისი ფასის ვარდნას უკავშირებენ მათ შორის იმ შეზღუდვებს, რომლებსაც ბიტკოინის წინააღმდეგ ჩინეთის ხელისუფლება აწესებს.

ჩინეთის მთავრობამ აკრძალა ქვეყანაში ბიტკოინის მაინინგი (შექმნა), ასევე გადაწყვიტა ყველა იმ ვებგვერდის დაბლოკვა, რომელიც ციფრული ვალუტით ვაჭრობასთანაა დაკავშირებული.