სლოვენიის ქალაქ კრანში ბიტკოინის ქანდაკება დადგეს

მსოფლიოში პირველად ბიტკოინის ქანდაკება დადგეს. ბიტკოინის ქანდაკებამ ადგილი სლოვენიის ქალაქ კრანში დაიკავა. ის ქალაქის ახალ მოედანზე განათავსეს. ამის შესახებ სააგენტო reuters-ი წერს.

კრიპტოვალუტის გიგანტური სიმბოლოს შერჩევაში, რომელიც მეტალისგანაა დამზადებული და სამ ტონას იწონის, სლოვენიის მოსახლეობაც იყო ჩართული.

მონუმენტი ქალაქში ბლოკჩეინის ტექნოლოგიის განვითარების აღმნიშვნელია. როგორც კრანის მერი აცხადებს, სლოვენიის ამ ნაწილში პროგრამული უზრუნველყოფის კომპანიებმა დიდი ქსელი შექმნეს და ბლოკჩეინის მნიშვნელოვან ნაწილს წარმოადგენენ.

ამჟამად წამყვანი კრიპტოვალუტების ფასი ბაზარზე მცირდება.

2017 წლის დეკემბერში, პიკზე, ბიტკოინის კურსი 20 ათას დოლარს აღწევდა. ამის შემდეგ კრიპტოვალუტამ გაიაფება დაიწყო.

მისი ფასის ვარდნას უკავშირებენ მათ შორის იმ შეზღუდვებს, რომლებსაც ბიტკოინის წინააღმდეგ ჩინეთის ხელისუფლება აწესებს.

ჩინეთის მთავრობამ აკრძალა ქვეყანაში ბიტკოინის მაინინგი (შექმნა), ასევე გადაწყვიტა ყველა იმ ვებგვერდის დაბლოკვა, რომელიც ციფრული ვალუტით ვაჭრობასთანაა დაკავშირებული.