თამარ იოსელიანი: დავიწყეთ საქართველოს რკინიგზის ისტორიული განახლება და ვაშენებთ ანაკლიის ღრმაწყლოვან ნავსადგურს. ეს არის სწორედ ის ხედვა, რომელიც მოგვცემს შესაძლებლობას, ვიყოთ შეუცვლელი, სანდო, ეფექტიანი პარტნიორი შუა დერეფანში

დღეს საქართველოს საერთაშორისო საზღვაო ფორუმის შემაჯამებელი დღეა. ძალიან წარმატებული ორი დღე გვქონდა, - ასე აფასებს ეკონომიკისა და მდგრადი განვითარების მინისტრის მოადგილე თამარ იოსელიანი საქართველოს საერთაშორისო საზღვაო ფორუმის მუშაობას.

თამარ იოსელიანის თქმით, ფორუმის ფარგლებში ბათუმში შეიკრიბნენ საერთაშორისო საზღვაო და სატრანსპორტო ინდუსტრიის წარმომადგენლები და გაიმართა მსჯელობა იმ ძალიან მნიშვნელოვან საკითხებზე, რომლებიც საერთაშორისო საზღვაო სავაჭრო სისტემაშია მნიშვნელოვანი.

„უმნიშვნელოვანესია საქართველოს როლი შუა დერეფნის კონტექსტში. საინტერესო დისკუსია გაიმართა, თუ რა მნიშვნელობა ენიჭება დღეს დაკავშირებადობის თვალსაზრისით საქართველოს და შესაბამისად, შუა დერეფანს. ის, რომ საქართველო არის შეუცვლელი პარტნიორი შუა დერეფნის კონტექსტში და ის, რომ საქართველოს აქვს სწორი, თანმიმდევრული ხედვა და გეგმა, თუ როგორ უნდა განავითაროს, ზოგადად, სატრანსპორტო სისტემა. გვაქვს 10-წლიანი გეგმა შემუშავებული, თუ როგორ უნდა განვითარდეს საქართველოს სატრანსპორტო სისტემა და სახელმწიფოს ხედვაა, რომ 2032 წლამდე უნდა დაიხარჯოს დაახლოებით 7 მილიარდი ამერიკული დოლარი იმისთვის, რათა გაჯანსაღდეს არსებული სატრანსპორტო სისტემა და შესაბამისად, გავაორმაგოთ გამტარუნარიანობა“, - აღნიშნა თამარ იოსელიანმა.

მისივე განმარტებით, ამ მხრივ ქვეყანაში ძალიან მნიშვნელოვან ნაბიჯებს დგამენ.

„დავიწყეთ საქართველოს რკინიგზის ისტორიული განახლება და ვაშენებთ ანაკლიის ღრმაწყლოვან ნავსადგურს. ეს არის სწორედ ის ხედვა, რომელიც მოგვცემს შესაძლებლობას ვიყოთ შეუცვლელი, სანდო, ეფექტიანი პარტნიორი შუა დერეფანში“, - განაცხადა თამარ იოსელიანმა.