თამარ იოსელიანი: 2026 წელი რკინიგზისთვის იქნება უმნიშვნელოვანესი წელი, რადგანაც ერთი მილიარდი ლარის ინვესტიციის განხორციელება იგეგმება „საქართველოს რკინიგზის“ ინფრასტრუქტურაში

2026 წელი რკინიგზისთვის იქნება უმნიშვნელოვანესი წელი, რადგანაც ერთი მილიარდი ლარის ინვესტიციის განხორციელება იგეგმება „საქართველოს რკინიგზის“ ინფრასტრუქტურაში და ამჯერად, სალოკომოტივო პარკის განახლება იგეგმება. საჭიროება დგას 50 ახალი ლოკომოტივის შეძენის. ამასთან, დამატებით სავაგონო პარკიც განახლდება, - განაცხადა „დღის ქრონიკასთან“ ეკონომიკისა და მდგრადი განვითარების მინისტრის მოადგილემ თამარ იოსელიანმა.

მისი თქმით, დაგეგმილი პროექტები ერთობლიობაში მეტად ეფექტურ და მდგრად სატვირთი გადაზიდვების წარმოების საშუალებას შექმნის.

„ჩვენი მიზანია, რომ ბიუროკრატიისგან დაცლილი იყოს „საქართველოს რკინიგზის“ საოპერაციო ნაწილი. ციფრული სერვისის მიმართულებით მნიშვნელოვან ნაბიჯებს დგამს „საქართველოს რკინიგზა“, რაც თავისთავად ყველაფერი ერთად, ერთობლიობაში მოგვცემს ბევრად უფრო ეფექტურ და მდგრად სატვირთი გადაზიდვების წარმოების საშუალებას. აქვე დავამატებდი, რომ მოდერნიზაციის პროექტმა „საქართველოს რკინიგზას“ გამტარუნარიანობა გაუორმაგა. შესაბამისად, შეამცირა ქვეყნის გადაკვეთის დროს და ამასთანავე, რა თქმა უნდა შეამცირა საოპერაციო ხარჯები“, - განაცხადა თამარ იოსელიანმა.