სექტემბერში, წინა წლის იგივე პერიოდთან შედარებით, საქართველოში შემოსული და ქვეყნიდან გასული ფულადი გზავნილების მოცულობა გაიზარდა

საქართველოს ეროვნული ბანკის ინფორმაციით, მიმდინარე წლის სექტემბერში, ქვეყანაში შემოსული ფულადი გზავნილების ნაკადების მოცულობამ 209.7 მლნ აშშ დოლარი (653.5 მლნ ლარი) შეადგინა, რაც 8.8%-ით (17.0 მლნ აშშ დოლარით) მეტია 2020 წლის სექტემბრის ანალოგიურ მაჩვენებელზე.

უცხოეთიდან საქართველოში ფულადი გზავნილების 94.1% იმ 19 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ სექტემბერში 1 მლნ აშშ დოლარს გადააჭარბა. იმავე 19 ქვეყანაზე, გასული წლის სექტემბერში, მთელი ფულადი გზავნილების 94.7% მოდიოდა.

2021 წლის სექტემბერში, საქართველოდან საზღვარგარეთ 29.2 მლნ აშშ დოლარი (91.0 მლნ ლარი) გადაიგზავნა, რაც 2020 წლის სექტემბრის (25.1 მლნ აშშ დოლარი) ანალოგიურ მაჩვენებელთან შედარებით 16.6%-ით მეტია.