სოზარ სუბარი: ქვეყანას უნდა ჰქონდეს გარკვეული სტრატეგიული მიმართულებები, რომელთა წარმოება აუცილებელია

სოზარ სუბარმა საქართველოს ეკონომიკაზე კორონავირუსის გავლენაზე ისაუბრა. როგორც პრემიერ-მინისტრის მრჩეველმა „იმედის“ გადაცემა „ღია ეთერში“ განაცხადა, საქართველო მდიდარი ქვეყანა არ არის და მისი ბიუჯეტი შეზღუდულია.

„ჩვენ მოვახერხეთ ის, რომ ერთდროულად შევინარჩუნეთ მინიმალური გავრცელება და ამავდროულად არ გავაჩერეთ ყველა წარმოება. სტრატეგიული წარმოებები მეტნაკლებად მუშაობს, სოფლის მეურნეობის პროექტები ხორციელდება, ახალი ინიციატივებიც გამოვა მალე. ინფრასტრუქტურა, ძირითადი სტრატეგიული ობიექტები, მიმდინარეობს ისევ, თუმცა ძალიან ბევრი საწარმო გაჩერდა“, - განაცხადა სუბარმა.

ამასთან, პრემიერი მრჩეველმა აღნიშნა, რომ გაჩერებულია უამრავი ობიექტი, თუმცა ზოგმა საწარმომ ახალ რეალობასთან დროული ადაპტირება შეძლო და ახალი სფეროების ათვისება დაიწყო.

„უცებ ნათლად დავინახეთ, რომ კარგია ღია საზღვრები, კარგია ღია ვაჭრობა, მაგრამ ქვეყანას უნდა ჰქონდეს გარკვეული სტრატეგიული მიმართულებები, რომელთა წარმოება აუცილებელია. მარაგებიც და წარმოებებიც, იმიტომ რომ რაღაც მომენტში უცებ მარტო რჩები საკუთარ თავთან და ყველა ფიქრობს ასეთ დროს საკუთარ თავზე“, - აღნიშნა სუბარმა.

პრემიერის მრჩეველმა დასძინა, რომ საქართველოს მთავრობა ეკონომიკური კრიზისიდან გამოსვლის დეტალურ გეგმაზე მუშაობს და საერთაშორისო პარტნიორების დახმარების იმედი აქვს.