მაჭავარიანი ტელევიზიებს ვალების რესტრუქტურიზაციის მიზნით მოლაპარაკებას სთავაზობს

წლების განმავლობაში არსებობდა მანკიერი პრაქტიკა, როდესაც ტელეკომპანია აგროვებდა ვალს და ეს ერთხელ და სამუდამოდ უნდა გასწორდეს, - ამის შესახებ ჟურნალისტებს ფინანსთა მინისტრმა ივანე მაჭავარიანმა განუცხადა.

მისი თქმით, რესტრუქტურიზაციის მოტივი არის ის, რომ არსებობენ გაცილებით პატარა ტელევიზიები, რომლებიც პატიოსნად იხდიან გადასახადებს და ვალებს არ აგროვებენ.

მინისტრი უახლოეს ვადაში ელის ტელევიზიებისგან, რომ თავიანთი შეთანხმება წარადგინონ იმის შესახებ, თუ როგორ წარმოუდგენიათ რესტრუქტურიზაცია.

მიმდინარე დავალიანებები კი დღეიდან უნდა გადაიხადონ, რომ ვალი აღარ დაგროვდეს. მაჭავარიანის განცხადებით, ეს პროცესი რაც შეიძლება მალე უნდა დაიწყოს.

მინისტრის თქმით, იქნებიან მაქსიმალურად კონსტრუქციულები და ხელს შეუწყობენ ისეთ გადაწყვეტილებას, რომელმაც არ უნდა გამოიწვიოს ბიზნესის დახურვა, რადგან უმნიშვნელოვანესია, რომ ტელეკომპანიებმა იფუნქციონირონ.