პრემიერი: მთავრობა ანაკლიის კონსორციუმის თხოვნას ფინანსური დოკუმენტის წარდგენის გადავადებაზე მხარს დაუჭერს

საქართველოს პრემიერმინისტრის, მამუკა ბახტაძის განცხადებით, საქართველოს მთავრობა დათანხმდება ანაკლიის განვითარების კონსორციუმის თხოვნას, რომ გაუხანგრძლივდეს კონსორციუმს ფინანსური დახურვის დოკუმენტაციის წარსადგენად გათვალისწინებული ვადა. ამის შესახებ პრემიერმინისტრმა გადაცემა "პირისპირ"-ის ეთერში ვაშინგტონიდან ჩართვისას განაცხადა, სადაც ის ოფიციალური ვიზიტით არის ჩასული.

პრემიერმინისტრის განცხადებით, აშშ-ში ვიზიტის ფარგლებში ანაკლიის პროექტის შესახებაც ჰქონდა საუბრები. მისი განცხადებით, ანაკლიის პორტს საქართველოსთვის განსაკუთრებული მნიშვნელობა აქვს და ამ პროექტთან დაკავშირებით ის ქალაქ სიეტლში შეხვდა "ეს ეს ეი მარნის" ხელმძღვანელობას, რომელიც ანაკლიის კონსორციუმის მონაწილეა.

"ჩვენ ვართ დაინტერესებული იმაში, რომ ამ პროფილის მქონე ყველაზე ძლიერი ამერიკული კომპანიები წარმოდგენილნი იყვნენ ამ პროექტში. ამ პროექტს ჩვენი სრული მხარდაჭერა აქვს. როგორც კი ჩამოვალ, შემდეგ კვირას გვექნება მთავრობის სხდომა და მოხდება ამ საკითხის განხილვა და გადავადება ვადების. თითოეული ჩვენთაგანი დარწმუნებული უნდა იყოს იმაში, რომ ამ პროექტის რეალიზაცია არის თითოეული ნაბიჯით განსაზღვრული, რომელსაც კონკრეტული შედეგი მოაქვს. ჩვენ, მთავრობამ ავიღეთ ვალდებულება და ვასრულებთ მას და მაქსიმალურად ვცდილობთ დავეხმაროთ კონსორციუმს რომ მათ შეასრულონ ვალდებულებები, რათა საბოლოო ჯამში მოხდეს ამ მნიშვნელოვანი პროექტის რეალიზაცია.

რა თქმა უნდა, ჩვენ მხარს დავუჭერთ ამ საკითხს და ამავე დროს მსურს გავიმეორო - თითოეული ჩვენთაგანი და კონსორციუმის წევრებიც უნდა იყვნენ ორიენტირებულნი კონკრეტულ შედეგზე. თუ ყველა შეასრულებს თავის ვალდებულებას ეს პროექტი აუცილებლად შედგება. ჩვენ გავაგრძელებთ დიალოგს რომ დავეხმაროთ კონსორციუმს მის მიერვე აღებული ვალდებულებების შესრულებაში", - განაცხადა პრემიერმინისტრმა მამუკა ბახტაძემ.

ანაკლიის ღრმაწყლოვანი პორტის მშენებლობის დაფინანსების საკითხზე 21 მაისს მოლაპარაკებების მეორე რაუნდი გაიმართა. მხარეებმა კრედიტორი ინსტიტუტების მიერ წარმოდგენილი 8-პუნქტიანი მოთხოვნა განიხილეს.

შეხვედრის შემდეგ „თიბისი ბანკის” თანადამფუძნებელმა ბადრი ჯაფარიძემ განაცხადა, რომ ანაკლიის პროექტს არანაირი შეფერხება არ ემუქრება.

მიმდინარე წლის 7 მაისს ვიცეპრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა ანაკლიის მშენებარე პორტის ტერიტორია დაათვალიერა.

ანაკლიის ღრმაწყლოვანი პორტის მშენებლობა 2017 წლის დეკემბერში ადრეული სახმელეთო სამუშაოებით დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

რა ეტაპზეა ანაკლიის პორტის მშენებლობა, ნახეთ ამ ბმულზე.