აბანოთუბანსა და ლესელიძეზე პარკირების საათობრივი გადასახადი აგვისტოდან დაწესდება

თბილისის მერიის გადაწყვეტილებით, პარკირების საათობრივი გადასახადის საპილოტე პროექტი ლესელიძისა და აბანოთუბნის ტერიტორიაზე 1-ელი ივლისის ნაცვლად 1-ელი აგვისტოდან დაიწყება. ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.

თბილისის მერის თქმით, გასულ კვირას ზონალურ-საათობრივი პარკირების წესი დამტკიცდა, რომლის მიზანიც ქალაქში საცობების და ჰაერის დაბინძურების შემცირებაა. ამ მიზნის მისაღწევად კი Man-ის 50 ავტობუსი უკვე ჩამოვიდა და 40 ავტობუსი 1 თვეში ჩამოვა, წლის ბოლომდე კი თბილისში სულ 220 ახალი ავტობუსი შემოვა.

"იმდენად კომფორტული უნდა გახდეს საზოგადოებრივი ტრანსპორტი, რომ ადამიანებმა მანქანით არ იარონ. ზონალური პარკირების სისტემა პირველი ივლისიდან უნდა ამოქმედებულიყო და ამოქმედდება 1-ელი აგვისტოდან. საპილოტე პროექტი დაიწყება აბანოთუბანსა და კოტე აფხაზის (ლესელიძის) ქუჩაზე. ადგილობრივ მცხოვრებლებს საათობრივი პარკირება არ შეეხებათ და გადასახადის გადახდა არ მოუწევთ. ასევე უფასო იქნება პარკირება ელექტრომობილებისთვის. გადახდა შესაძლებელი იქნება გადახდის აპარატებით და სატელეფონო აპლიკაციით", - განაცხადა კახი კალაძემ.